Իսլամական հեղափոխության պահապանների կորպուսի ցամաքային ուժերը հայտնել է երկրի հարավարևելյան Սիստան և Բելուջիստան նահանգում 8 զինված ահաբեկչի ձերբակալության մասին։ Փոխանցում է իրանական Tasnim լրատվական գործակալությունը:
Ըստ ԻՀՊԿ հաղորդագրության՝ ձերբակալվածները զինված խմբեր են ձևավորել և նահանգի կենտրոնական շրջաններում անվտանգության դեմ ուղղված գործողություններ իրականացրել, այդ թվում՝ հարձակվել են ռազմական ու պարեկային պահակակետերի վրա:
«Հետախուզական ծառայությունների իրականացրած հատուկ գործողությունների արդյունքում խումբը հայտնաբերվել և ձերբակալվել է։ Առգրավվել է մեծ քանակությամբ զենք և զինամթերք», – նշել է կորպուսը։
ԻՀՊԿ-ն հավելել է, որ խմբավորման հիմնական նպատակներից է եղել ռազմական ու ոստիկանական օբյեկտների, ինչպես նաև նահանգի զարգացման ու շինարարական ծրագրերում ներգրավված ընկերությունների վերաբերյալ հետախուզական տվյալների հավաքագրումը։
«Բացի այդ, ձերբակալվածները, համագործակցելով ահաբեկչական խմբավորումների հետ, առևանգել են տարածաշրջանի ենթակառուցվածքային ծրագրերն իրականացնող ինժեներներին, որոնց հետագայում փոխանցել են սահմանից դուրս գտնվող ահաբեկչական խմբավորումներին»,- նշվել է հաղորդագրությունում։
Հետևեք մեզ տելեգրամում
