Կենցաղային ապրանքների և տեքստիլի «Madame Coco» թուրքական ապրանքանիշն ամբողջությամբ դադարեցնում է իր գործունեությունը Ռուսաստանում: Այդ մասին ՏԱՍՍ-ին հաղորդել է Էլեկտրոնային առևտրի շուկայի մասնակիցների ասոցիացիայի փորձագետ Նատալյա Քերմեդչիևան:
Նրա խոսքով՝ սա գործունեության ժամանակավոր դադարեցում կամ առանձին խանութների փակում չէ, այլ ընկերության լիակատար դուրսբերում ռուսական շուկայից: Ներկայումս ցանցը Ռուսաստանում շահագործում է 29 խանութ:
Քերմեդչիևայի խոսքով՝ ապրանքանիշը ռուսական շուկա է մտել 2023 թվականի փետրվարին և երկու տարվա ընթացքում խանութներ է բացել Մոսկվայի, Եկատերինբուրգի, Կազանի, Գրոզնիի և այլ քաղաքների խոշոր առևտրի կենտրոններում: 2025 թվականի սկզբին ընկերությունը հայտարարել է հետագա ընդլայնման ծրագրերի մասին:
Գործակալության աղբյուրների համաձայն՝ փակման հիմնական պատճառներն են հաճախորդների հոսքի և պահանջարկի նվազումը, վարձավճարների բարձր գինը, ինչպես նաև վաճառքի անկումը փոխհատուցելու անկարողությունը, ինչի պատճառով, ամենայն հավանականությամբ, ընկերությունը սնանկացման եզրին է հասել:
Հետևեք մեզ տելեգրամում
