Իսրայելի վարչապետ Բենիամին Նեթանյահուն հայտարարել է, որ Իսրայելը մերժում է ԱՄՆ նախագահ Դոնալդ Թրամփի՝ Գազայի հատվածի վերաբերյալ 15 կետից բաղկացած ծրագիրը: Այս մասին հայտնում է «BBC»-ն։
«Իսրայելը մերժում է 15 կետից բաղկացած փաստաթուղթը։ Իսրայելի բանակը որևէ դուրսբերում չի իրականացնի և կշարունակի չեզոքացնել մեր ուժերին ու քաղաքացիներին սպառնացող վտանգներն այնքան ժամանակ, քանի դեռ ՀԱՄԱՍ-ն իրականում չի զինաթափվել»,- կառավարության նիստում հայտարարել է Նեթանյահուն։
Նա նաև հայտնել է, որ ծրագրի հետագա իրականացման շուրջ քննարկումները շարունակվում են ամերիկյան կողմի հետ։ «Դրանք գաղափարներ ունեն։ Դրանցից որոշներն ընդունելի են մեզ համար, որոշները՝ ոչ, և մենք գիտենք, թե ինչպես պաշտպանել մեր դիրքորոշումն այս հարցերում»,- ասել է Իսրայելի վարչապետը։
ԱՄՆ-ի նախաձեռնությամբ ստեղծված «Խաղաղության խորհուրդը» նախորդ ամիս հայտարարել էր, որ համաձայնություն է ձեռք բերվել ՀԱՄԱՍ-ի և Գազայում գործող մյուս զինված խմբավորումների «ամբողջական զինաթափման» շուրջ։ ՀԱՄԱՍ-ը, սակայն, ծանր սպառազինությունը հանձնելը պայմանավորել է Իսրայելի կողմից «ագրեսիայի բոլոր ձևերի» դադարեցմամբ և Գազայից իսրայելական ուժերի դուրսբերմամբ։
ՀԱՄԱՍ-ի ներկայացուցիչը «BBC»-ին հայտնել է, որ շարժումը վերահաստատում է իր հանձնառությունը ձեռք բերված պայմանավորվածություններին և պատրաստ է «լրջորեն և պատասխանատու կերպով» մասնակցել 15 կետից բաղկացած ծրագրի իրականացմանը։ Շարժումը միջնորդներին կոչ է արել ապահովել բոլոր կողմերի կողմից պայմանավորվածությունների կատարումը։
Միաժամանակ «Խաղաղության խորհրդի» բարձրաստիճան ներկայացուցիչ Նիկոլայ Մլադենովը հայտարարել է, որ ԱՄՆ-ի աջակցությամբ մշակված ծրագիրը շարունակում է մնալ Գազայի հարցում առաջ շարժվելու միակ ճանապարհը։ Նրա խոսքով՝ Իսրայելից զորքերի դուրսբերում չի պահանջվի այնքան ժամանակ, քանի դեռ հնարավոր չէ հաստատել, որ ՀԱՄԱՍ-ն իրական քայլեր է ձեռնարկում զինաթափման ուղղությամբ։
Հիշեցնենք, որ Թրամփի ծրագիրը, որը ներկայացվել էր 2025 թվականի սեպտեմբերին, նախատեսում է ՀԱՄԱՍ-ի զինաթափում, իսրայելական ուժերի դուրսբերում Գազայից և տարածքի վերականգնում:
ՄԱԿ-ի տվյալներով՝ Գազայի պատերազմի մեկնարկից ի վեր տեղահանվել է շուրջ 1,9 մլն մարդ՝ տարածքի բնակչության մոտ 90 տոկոսը։ Գազայի առողջապահության նախարարության տվյալներով՝ իսրայելական ռազմական գործողությունների հետևանքով զոհվել է ավելի քան 73 հազար մարդ։
Հետևեք մեզ տելեգրամում
