Սիրիան և Ռուսաստանը փոխըմբռնման հուշագիր են ստորագրել Սիրիայի տարածքում տեղակայված ռուսական ռազմաբազաների հետագա գործունեության վերաբերյալ։ Այս մասին հայտնում է SANA գործակալությունը՝ հղում անելով Սիրիայի ԱԳՆ հասարակայնության հետ կապերի վարչությանը։
Սիրիայի ԱԳՆ-ում հույս են հայտնել, որ փաստաթուղթը հնարավորություն կտա նոր փուլ սկսել Դամասկոսի և Մոսկվայի հարաբերություններում։
SANA-ի տվյալներով՝ քաղաքացիական օգտագործման համար նախատեսված մի շարք օբյեկտների կառավարումը կանցնի սիրիական կողմին։ Դրանց թվում նշվում են Հմեյմիմ ավիաբազան և Տարտուսի նավահանգստի չորրորդ առևտրային նավամատույցը։
Նշենք, որ հունիսին ՌԴ արտաքին գործերի փոխնախարար Գեորգի Բորիսենկոն հայտարարել էր, որ ռուսական ռազմական զորակազմը շարունակում է մնալ Սիրիայում։ Նրա խոսքով՝ ռուսական ուժերի ներկայությունը համաձայնեցվել էր երկրի նախկին ղեկավարության հետ, իսկ Սիրիայի ներկայիս իշխանությունները պաշտոնապես չեն չեղարկել այդ պայմանավորվածությունները։
Հետևեք մեզ տելեգրամում
