Վրաստանն ունի բոլոր ռեսուրսները Սու-25 գրոհային ինքնաթիռներ արտադրելու և արտահանելու համար։ Այս մասին հունիսի 8-ին վրացական «Palette News» հեռուստաալիքի եթերում հայտարարել է Վրաստանի պաշտպանության նախարար Իրակլի Գարիբաշվիլին։
«Այսօր մենք ունենք բացարձակապես բոլոր ռեսուրսները՝ տեխնիկական, մտավոր կամ մարդկային, որպեսզի ինքներս մեզ համար վերանորոգենք, վերականգնենք Սու-25-երը, արտադրենք նորը և վաճառենք», – վստահեցրել է նախարարը:
Ըստ Վրաստանի պաշտպանության նախարարի՝ ինքնաթիռների արտադրությունը գրավիչ է ինչպես առևտրային տեսանկյունից, այնպես էլ երկրի պաշտպանության համար և հավելել, որ Թբիլիսիի ավիացիոն գործարանը կարող է հիմք հանդիսանալ Սու-25 գրոհային ինքնաթիռների ստեղծման համար:
Գարիբաշվիլին ասել է, որ ինքը կարգադրել է, որպեսզի Վրաստանում սկսեն նռնակների, հրթիռների և նռնականետերի արտադրությունը, որոնք համապատասխանում են ՆԱՏՕ-ի չափանիշներին:
Նա նաև նշել է, որ Վրաստանում ՆԱՏՕ-ի նմուշով փամփուշտների գործարան կառուցելու որոշումը նույնպես ուժի մեջ է մնում:
Հետևեք մեզ տելեգրամում
