Հայաստանը որդեգրում է էներգետիկ անկախություն ունենալու ռազմավարություն՝ շեշտը դնելով արևային էներգետիկայի և էլեկտրաէներգիայի կուտակման համակարգերի զարգացման վրա։ Այս մասին, «Արմենպրես» լրատվական գործակալության հաղորդմամբ, Ազգային ժողովում կառավարության ծրագիրը ներկայացնելիս հայտարարել է վարչապետ Նիկոլ Փաշինյանը։
Վարչապետի խոսքով՝ էներգետիկ անկախության հասնելու հեռանկարը վերջին տարիներին ավելի իրատեսական է դարձել՝ հատկապես վերականգնվող, մասնավորապես՝ արևային էներգետիկայի զարգացման շնորհիվ։ «Հայաստանի Հանրապետությունը արևային հսկայական ռեսուրս ունի, և մենք այս ռեսուրսը զարգացրել ենք։ 2018 թվականի 16 մեգավատի դիմաց այսօր ունենք 1213 մեգավատ արևային էլեկտրակայաններ», – նշել է Փաշինյանը։
Նրա խոսքով՝ հաջորդ փուլում Հայաստանում նախատեսվում է էլեկտրաէներգիայի կուտակիչների ներդրում, որոնք հնարավորություն կտան ցերեկային ժամերին արտադրված արևային էներգիան կուտակել և օգտագործել գիշերը։
Մինչև 2031 թվականը կառավարությունը նախատեսում է ունենալ առնվազն 800 մեգավատ հզորությամբ կուտակիչ կայաններ։ Փաշինյանի խոսքով՝ այդ ցուցանիշը շուրջ երկու անգամ գերազանցում է գործող ատոմային էլեկտրակայանի դրվածքային հզորությունը։
Վարչապետն անդրադարձել է նաև Հայաստանի ատոմային էներգետիկայի ապագային՝ նշելով, որ առաջիկա մեկ տարվա ընթացքում Հայաստանը պետք է վերջնական որոշում կայացնի նոր ատոմային էլեկտրակայանի կառուցման հարցում։
«Առաջիկա մեկ տարվա ընթացքում մենք պետք է վերջնականապես կողմնորոշվենք, թե ում հետ և ինչ ատոմային կայան ենք կառուցելու, որովհետև 2036 թվականին գործող ատոմակայանի ռեսուրսը սպառվում է», – ասել է Փաշինյանը։
Միաժամանակ նա չի բացառել, որ տեխնոլոգիական զարգացումները հնարավորություն տան 2036 թվականից հետո ևս մեկ անգամ երկարաձգել Հայկական ատոմային էլեկտրակայանի շահագործման ժամկետը։
Փաշինյանի խոսքով՝ հայկական կողմն այդ հարցով բանակցություններ է վարում հնարավոր գործընկերների հետ, իսկ շահագործման ժամկետի հնարավոր երկարաձգման վերաբերյալ որոշումը կընդունվի միայն միջազգային իրավասու կառույցների հետ համագործակցությամբ։
Հետևեք մեզ տելեգրամում
