Հավաքական անվտանգության պայմանագրի կազմակերպության շրջանակում Հայաստանի հետ ռազմական, ռազմատեխնիկական և այլ ոլորտներում համագործակցություն ներկայում չի իրականացվում։ Այս մասին «ՌԻԱ Նովոստի»-ին տված հարցազրույցում հայտարարել է Ռուսաստանի ԱԳՆ ԱՊՀ երկրների առաջին դեպարտամենտի տնօրեն Միքայել Աղասանդյանը։
Պատասխանելով հարցին՝ արդյոք ՀԱՊԿ-ի շրջանակում ռազմատեխնիկական մատակարարումների արտոնյալ պայմանները տարածվում են Հայաստանի վրա, Աղասանդյանը նշել է․ «Այս պահին ՀԱՊԿ-ի գծով Հայաստանի հետ ռազմական, ռազմատեխնիկական և այլ ոլորտներում համագործակցություն չի իրականացվում»։
Միաժամանակ նա նշել է, որ այդ ուղղությամբ Երևանի հետ համագործակցությունը պահպանվում է երկկողմ ձևաչափով։ «Կա անհրաժեշտ իրավական բազա, որը, ի թիվս այլնի, նախատեսում է նաև ռազմական նշանակության արտադրանքի մատակարարումներ արտոնյալ պայմաններով», – ասել է Աղասանդյանը։
Ավելի վաղ ՀԱՊԿ-ում Ռուսաստանի մշտական ներկայացուցիչ Վիկտոր Վասիլևը հայտարարել էր, որ կազմակերպության մարմիններում Հայաստանին ձայնի իրավունքից զրկելու մասին որոշման ընդունման համար անհրաժեշտ կլինի կոնսենսուս։
Նրա խոսքով՝ ՀԱՊԿ Հավաքական անվտանգության խորհրդի հերթական նստաշրջանը կանցկացվի նոյեմբերի 11-ին Մոսկվայում, և, ամենայն հավանականությամբ, անդամ երկրների ղեկավարները կքննարկեն նաև Հայաստանի ձայնի իրավունքի հարցը։
Հիշեցնենք, որ Հայաստանը 2024 թվականին սառեցրել է իր մասնակցությունը Հավաքական անվտանգության պայմանագրի կազմակերպությանը։
Հետևեք մեզ տելեգրամում
