Հարավային Սուդանում հարձակման հետևանքով զոհվել է ՄԱԿ-ի երկու խաղաղապահ, ևս երեքը վիրավորվել են։ Այս մասին հայտնել է Հարավային Սուդանում ՄԱԿ-ի առաքելությունը։
Ըստ հաղորդագրության՝ զինված անձինք Ջոնգլեյ նահանգում դարանակալել են պարեկային խմբին, որը շարժվում էր Պաջուտ բնակավայրի ուղղությամբ։
Զոհված խաղաղապահների ինքնությունն ու քաղաքացիությունը դեռ չեն հրապարակվել։ Հարձակման հետևանքով վիրավորվել են նաև Հարավային Սուդանի ոստիկանության երկու աշխատակից և առաքելությանը կից երկու քաղաքացիական աշխատակից։
Հարձակումը տեղի է ունեցել Հարավային Սուդանում անվտանգային իրավիճակի շարունակական վատթարացման և նոր քաղաքացիական պատերազմի վտանգի աճի ֆոնին։
ՄԱԿ-ի տվյալներով՝ հունվարից հուլիս ընկած ժամանակահատվածում երկրում գրանցվել է մարդասիրական օգնություն տրամադրող կազմակերպությունների աշխատակիցների և նրանց գույքի դեմ ավելի քան 450 հարձակում, ինչը ավելի քան երկու անգամ գերազանցում է նախորդ տարվա նույն ժամանակահատվածի ցուցանիշը։ Այդ հարձակումների հետևանքով զոհվել է առնվազն 36 աշխատակից։
Նշենք, որ Հարավային Սուդանում ամիսներ շարունակ շարունակվում են բախումները կառավարական ուժերի և ընդդիմության առաջնորդ Ռիեկ Մաչարի կողմնակիցների միջև։ Նախկին փոխնախագահ Մաչարը անցյալ տարի հեռացվել էր պաշտոնից և այժմ գտնվում է տնային կալանքի տակ՝ պետական դավաճանության մեղադրանքով, որը նա քաղաքականապես մոտիվացված է համարում։
Նախագահ Սալվա Կիրի և Մաչարի միջև 2018 թվականի իշխանության բաժանման համաձայնագիրը փաստացի խզվել է։ Դեկտեմբերից մարտերը սրվել են, երբ ընդդիմադիր ուժերը Ջոնգլեյում գրավել են մի շարք կառավարական դիրքեր, ինչին իշխանությունները պատասխանել են օդային հարվածներով և ցամաքային գործողություններով։
Միացյալ Նահանգները կոչ է արել կողմերին վերադառնալ բանակցությունների՝ նախազգուշացնելով Հարավային Սուդանում լայնածավալ քաղաքացիական պատերազմի վերսկսման վտանգի մասին։
Հետևեք մեզ տելեգրամում
