Իսրայելը պատրաստ է աջակցել Գազայի բնակչության ամբողջական տեղափոխմանը՝ ԱՄՆ-ի հավանության դեպքում

Իսրայելը պատրաստ է Գազայի հատվածից պաղեստինցիների տեղափոխմանը, սակայն ծրագրի իրականացման համար սպասում է ԱՄՆ-ի համաձայնությանը։ Այս մասին Ynet-ի և Yedioth Ahronoth-ի կազմակերպած համաժողովում հայտարարել է Իսրայելի պաշտպանության նախարար Իսրայել Կացը։

Նախարարի խոսքով՝ Իսրայելի կառավարությունը «պատրաստ է նրանց դուրս բերել՝ ծովով, օդով և հնարավոր բոլոր ճանապարհներով»։
Կացը պնդել է, որ ԱՄՆ նախագահ Դոնալդ Թրամփը Գազայի բնակիչների տեղափոխման գաղափարը ոչ թե չեղարկել, այլ «սառեցրել է»։

«Ծրագիրը չի չեղարկվել, այն մշտապես քննարկվում է, նույնիսկ հիմա։ Կարծում եմ՝ այլ լուծում չկա»,- ասել է նա՝ հավելելով, որ դրա իրականացման համար անհրաժեշտ է ԱՄՆ-ի համաձայնությունը։

Կացի խոսքով՝ Իսրայելը կարող է այդ համաձայնությունը ստանալ, եթե պարզ դառնա, որ ՀԱՄԱՍ-ը չի կատարում հրադադարի համաձայնագրով ստանձնած պարտավորությունները։

Հիշեցնենք, որ 2025 թվականին Թրամփն առաջարկել էր Գազայի շուրջ 2 միլիոն պաղեստինցիներին տեղափոխել այլ երկրներ։ Արաբական երկրների, մասնավորապես՝ Եգիպտոսի կոշտ հակազդեցությունից հետո նա հետ էր կանգնել գաղափարի ակտիվ առաջմղումից։ Հետագայում Գազայի վերաբերյալ ԱՄՆ-ի ներկայացրած հրադադարի ծրագրում ամրագրվել էր, որ բնակիչների հարկադիր տեղահանում չի իրականացվի։