Վրաստանի վարչապետ Իրակլի Կոբախիձեն հայտարարել է, որ երկիրը մինչև 2032 թվականը նախատեսում է մոտ 7 միլիարդ դոլար ներդնել տրանսպորտային և լոգիստիկ ենթակառուցվածքների զարգացման համար։ Այս մասին նա հայտարարել է Բաթումում անցկացվող Վրաստանի միջազգային ծովային ֆորումում։
Կոբախիձեի խոսքով՝ ներդրումները պետք է նպաստեն «Միջին միջանցքի» զարգացմանն ու Վրաստանի՝ Արևելքն ու Արևմուտքը կապող տրանսպորտային հանգույցի դերի ամրապնդմանը։
Նա նշել է, որ երկրի 10-ամյա ծրագիրը նախատեսում է երկաթուղիների և նավահանգիստների հզորությունների կրկնապատկում, միջազգային օդանավակայանների հզորությունների եռապատկում, ինչպես նաև բեռնափոխադրումների ժամանակի կրճատում։ Վարչապետի տվյալներով՝ միայն այս տարի «Վրացական երկաթուղիների» ենթակառուցվածքների և շարժակազմի արդիականացման համար կներդրվի ավելի քան 1 միլիարդ լարի։ Նա նաև հայտնել է, որ Արևելք-Արևմուտք միջազգային մայրուղու շինարարության շուրջ 75%-ն արդեն ավարտվել է։
Կոբախիձեն նշել է, որ «Միջին միջանցքի» արդյունավետությունը կախված է տարածաշրջանի երկրների տրանսպորտային ենթակառուցվածքների և համակարգերի փոխկապակցվածությունից։ Նա որպես օրինակ նշել է Բաքու-Թբիլիսի-Կարս երկաթուղին՝ ընդգծելով նաև Սև ծովի կապի հետագա ամրապնդման անհրաժեշտությունը։
Նշենք, որ «Միջին միջանցքը» Չինաստանը և Կենտրոնական Ասիան Եվրոպային կապող տրանսպորտային երթուղի է, որն անցնում է Կասպից ծովով, Ադրբեջանով, Վրաստանով և Թուրքիայով։
Հետևեք մեզ տելեգրամում
