Ուկրաինայի նախագահ Վոլոդիմիր Զելենսկին հայտարարել է, որ Կիևում ԱՄՆ նախագահի հատուկ ներկայացուցիչներ Սթիվ Ուիթքոֆի և Ջարեդ Քուշների, ինչպես նաև Ֆրանսիայի, Մեծ Բրիտանիայի և Գերմանիայի ազգային անվտանգության հարցերով խորհրդականների հետ բանակցությունների ընթացքում քննարկվել են պատերազմի ավարտի հնարավոր պայմանները, անվտանգության և տնտեսական երաշխիքները, ինչպես նաև Ուկրաինային կարճաժամկետ աջակցությունը։ Այս մասին հայտնում է Ukrainska Pravda-ն:
Զելենսկիի խոսքով՝ սեպտեմբերի 6-ին կայացել է բանակցությունների երեք փուլ, որոնք, նրա գնահատմամբ, եղել են բովանդակալից։ «Եթե պատերազմը շարունակվի ձմռանը, իսկ այս պահին այդպես է թվում, մենք մեծապես ապավինում ենք «ձմեռային փաթեթին»», – ասել է Զելենսկին։
Նա նշել է, որ այդ փաթեթի շրջանակում Ուկրաինան ակնկալում է հակաօդային պաշտպանության միջոցներ, աջակցություն էներգետիկ ոլորտին, ինչպես նաև ամերիկյան հեղուկացված բնական գազի օգտագործման հնարավորություն։
Զելենսկին նաև անդրադարձել է տարածքային հարցին՝ նշելով, որ այն շարունակում է մնալ հրատապ։
«Տարածքային հարցը շարունակում է մնալ հրատապ։ Դա չի նշանակում, որ մենք դրա մասին երկար ենք խոսել, սակայն մենք հնարավորություն ունեցանք և քննարկեցինք այն։ Ես շարունակում եմ այն դիրքորոշմանը, որ նման բարդ հարցերը կարող են լուծվել միայն առաջնորդների մակարդակով», – ասել է Ուկրաինայի նախագահը։
Նրա խոսքով՝ բանակցությունների ընթացքում քննարկվել են նաև անվտանգության և տնտեսական երաշխիքները, Ուկրաինայի վերականգնումն ու երկրի բարգավաճման ծրագիրը։ «Մեր զինված ուժերը պետք է ուժեղ լինեն, և դա մեզ համար անվտանգության հիմնական երաշխիքն է։ Այս ամենը ռեսուրսներ է պահանջում։ Հետևաբար երաշխիքները պետք է լինեն ուժեղ և հստակ», – ասել է Զելենսկին։
Հիշեցնենք, որ սեպտեմբերի 6-ին ԱՄՆ նախագահի հատուկ ներկայացուցիչներ Սթիվ Ուիթքոֆն ու Ջարեդ Քուշները գնացքով ժամանել են Կիև, որտեղ նրանց Սոֆիայի հրապարակում դիմավորել է Վոլոդիմիր Զելենսկին։ Այնուհետև նրանք այցելել են Սուրբ Սոֆիայի տաճար, որից հետո անցել բանակցությունների։
Հետևեք մեզ տելեգրամում
