Եմենի միջազգայնորեն ճանաչված կառավարությանն աջակցող ուժերը հակահարձակում են սկսել հութիների դեմ՝ հայտարարելով երկրի մայրաքաղաք Սանան խմբավորումից հետ գրավելու նպատակադրության մասին։
Սեպտեմբերի 7-ին մարտերը սրվել են Թաիզ, Ալ-Բայդա և Ալ-Ջաուֆ նահանգներում։ Կառավարական ուժերը, որոնց աջակցում է Սաուդյան Արաբիան, հայտարարել են հութիների դիրքերի ուղղությամբ հրթիռային և անօդաչու թռչող սարքերի հարվածների, ինչպես նաև ցամաքային ուժերի մասնակցությամբ ինտենսիվ մարտերի մասին։
Կառավարամետ ուժերի ներկայացուցիչ Մաջիդ ալ-Նուզայլին հայտարարել է, որ ռազմական գործողության նպատակն է «Եմենն ազատագրել» հութիների վերահսկողությունից և Սանան վերադարձնել որպես բոլոր եմենցիների մայրաքաղաք։ Նա նաև կոչ է արել խաղաղ բնակիչներին խուսափել Սանա տանող մի շարք հիմնական ճանապարհներից։
Եմենի նախագահական ղեկավարության խորհրդի ղեկավար Ռաշադ ալ-Ալիմին հայտնել է, որ կառավարական ուժերը առաջխաղացում են արձանագրել Ալ-Ջաուֆում, Ալ-Բայդայում, Թաիզում և Հոդեյդայում։
Հութիները, իրենց հերթին, հերքել են կառավարական ուժերի առաջխաղացման վերաբերյալ պնդումները և հայտարարել են, որ իրենց ուժերը հետ են մղել Ալ-Ջաուֆի Ալ-Լաբանաթ լեռների ուղղությամբ իրականացված լայնածավալ հարձակումը։ Հութիները նաև Սաուդյան Արաբիային մեղադրել են Ալ-Հազմ քաղաքի բանտի ուղղությամբ օդային հարված հասցնելու մեջ, որի հետևանքով առնվազն յոթ մարդ է զոհվել։
Մինչդեռ Ռիադը հայտարարել է, որ հութիների վերջին հարձակումների հետևանքով Սաուդյան Արաբիայի հարավային նահանգներում առնվազն 73 խաղաղ բնակիչ է վիրավորվել, այդ թվում՝ կանայք և երեխաներ, և խոստացել է պատասխանել։
Ներկայիս բախումները համարվում են Եմենում 2022 թվականին ՄԱԿ-ի միջնորդությամբ հաստատված հրադադարից հետո ամենալուրջ սրացումներից մեկը։ Առողջապահության համաշխարհային կազմակերպության տվյալներով՝ օգոստոսի 23-ից ի վեր մարտերի հետևանքով առնվազն 728 մարդ զոհվել կամ վիրավորվել է։ Առավել ծանր իրավիճակը Թաիզում և երկրի արևմտյան ափամերձ հատվածներում է։ Միայն Թաիզից հինգշաբթի օրվանից ի վեր տեղահանվել է մոտ 21 հազար մարդ՝ շուրջ 3 հազար ընտանիք։
Հետևեք մեզ տելեգրամում
