Սիրիայում ռուսական զրահամեքենա է պայթեցվել

Սիրիայի Իդլիբ քաղաքում ռուս-թուրքական ուժերի համատեղ պարեկության ճանապարհին պայթյուն է տեղի ունեցել։

Նախօրեին ռուսական ռազմական ոստիկանությունը և Թուրքիայի զինված ուժերը հերթական պարեկային հսկողությունն են իրականացրել Իդլիբի Մ4 մայրուղում։ Այս մասին տեղեկացնում են Ռուսաստանի պաշտպանության նախարարությունից։

ՌԴ ՊՆ ներկայացուցիչ, գեներալ-մայոր Իգոր Կոնաշենկովի խոսքով՝ զինյալները փորձել են խոչընդոտել ռուս-թուրքական մոնիտորինգին՝ Էրիխից դեպի Ուրում էլ Ջաուզա ընկած ճանապարհահատվածում պայթյուն կազմակերպելով։

Պայթեցվել է ռուսական БТР-82А զրահամեքենան։ Ռուսական կողմի տեղեկացմամբ՝ վնասներն աննշան են, միջադեպի հետևանքով զինծառայողները չեն տուժել։

Նշենք, որ մայիսի վերջին Իդլիբում նմանատիպ գործողության հետևանքով մի թուրք զինծառայող էր զոհվել։ Այդ ժամանակ էլ թուրքական պարեկային մեքենան պայթեցվել էր նույն Մ4 մայուրուղու վրա տեղադրված ինքնաշեն ռումբի միջոցով։

2020թ․ մարտին Մոսկվայում կայացած ռուս-թուրքական բարձրաստիճան հանդիպման ժամանակ քննարկվել էր Սիրիայի հարցը։ Կողմերը համաձայնության էին եկել սիրիական հիմնախնդրի կարգավորման և խաղաղ բնակչության ազատ տեղաշարժն ապահովելու նպատակով թուրք-սիրիական սահմանին համատեղ պարեկություն իրականացնելու շուրջ։