Գերմանիայի կանցլեր Ֆրիդրիխ Մերցը Կիևում հայտարարել է Ուկրաինային 1 մլրդ եվրոյի ռազմական օգնություն տրամադրելու մասին: Նա նաև հայտնել է Ուկրաինայի էներգետիկ ենթակառուցվածքների վերականգնման համար ևս 350 մլն եվրո հատկացնելու մասին։ Այս մասին հայտնում է «The Guardian»-ը։
Մերցի խոսքով՝ Գերմանիան նախատեսում է ֆինանսավորել նաև ռուսական ռեակտիվ անօդաչու թռչող սարքերը որսալու համար նախատեսված դրոնների համատեղ արտադրությունը։ Գերմանիայի կանցլերը նշել է, որ վերջին շաբաթներին տեխնիկական զգալի առաջընթաց է գրանցվել, ինչը հնարավորություն է տալիս արագացնել դրանց արտադրությունը։
Մերցի այցի ընթացքում գերմանական ընկերությունների ներկայացուցիչները Ուկրաինայի հետ ստորագրել են նաև 14 համաձայնագիր՝ մոտ 6,6 մլրդ եվրո ընդհանուր արժեքով։
Մերցը հայտարարել է, որ Գերմանիայի աջակցությունը պայմանավորված է ոչ միայն Ուկրաինայի տարածքային ամբողջականության պաշտպանությամբ, այլև Եվրոպայի անվտանգության շահերով։ Նա Ռուսաստանին մեղադրել է նաև կիբերհարձակումներ և ապատեղեկատվական արշավներ իրականացնելու մեջ։ Միաժամանակ, Ուկրաինայի նախագահ Վոլոդիմիր Զելենսկին հայտարարել է, որ Ռուսաստանը, իր կարծիքով, կարող է ռեակտիվ դրոնների տեխնոլոգիան փոխանցած լինել Հյուսիսային Կորեային։ Նա նշել է, որ Փհենյանը Ռուսաստանին արդեն տրամադրել է հրետանային զինամթերք և բալիստիկ հրթիռներ
Ուկրաինայի նախագահը նաև հայտնել է, որ ԱՄՆ-ը ցանկանում է մինչև հոկտեմբերի վերջ Ռուսաստանի և Ուկրաինայի միջև խաղաղության բանակցությունների նոր փուլ կազմակերպել։
Կիևում Մերցի գտնվելու ընթացքում քաղաքում մի քանի անգամ հնչել են օդային տագնապի ազդանշաններ և պայթյունների ձայներ։ «The Guardian»-ի փոխանցմամբ՝ ռուսական դրոնը հարվածել է Դնեպր գետի վրայով անցնող Հյուսիսային կամրջին։ Ավելի ուշ ռուսական ավիահարված է հասցվել Խարկովին, որի հետևանքով մեկ մարդ զոհվել է, ևս վեցը՝ վիրավորվել։
Հետևեք մեզ տելեգրամում
