Վրաստանի կառավարությունը մինչև 2027 թվականի հունվարի 1-ը երկարաձգել է Ուկրաինայի պատերազմի պատճառով Վրաստան տեղափոխված և երկրում անընդմեջ գտնվող Ուկրաինայի քաղաքացիներին տրամադրվող բժշկական և սոցիալական օգնությունը։ Համապատասխան որոշումները ստորագրել է Վրաստանի վարչապետ Իրակլի Կոբախիձեն։ Այս մասին հայտնել է «NewsGeorgia»-ն։
Ուկրաինայի քաղաքացիներին և Ուկրաինայում մշտական բնակության իրավունք ունեցող անձանց ընտանիքներին կշարունակվի տրամադրվել ամսական 300 լարի բնակարանային պայմանների համար, ինչպես նաև 45 լարի՝ յուրաքանչյուր անձի հաշվով։ Ըստ Վրաստանի կառավարության վարչակազմի՝ օգնությունը նախատեսված է նրանց համար, ովքեր Ուկրաինայում շարունակվող ռազմական գործողությունների պատճառով են մուտք գործել Վրաստան։
Նշվում է, որ մինչև 2027 թվականի հունվարի 1-ը կշարունակվի նաև բժշկական օգնության տրամադրումը։ Դրա շրջանակում ներառված են պատվաստումները, տուբերկուլյոզի, ՄԻԱՎ-ի և ՁԻԱՀ-ի բուժումը, մոր և երեխայի առողջության պահպանման ծրագրերը, հոգեկան առողջության ծառայությունները, շաքարախտի բուժումը, դիալիզը, հազվադեպ հիվանդությունների բուժումը և շտապ բժշկական օգնությունը, այդ թվում՝ ծննդօգնությունը։
Վրաստանի կառավարության որոշմամբ՝ եթե անձը լքի Վրաստանը, նրա 45 լարիի վճարումը կդադարեցվի հաջորդ ամսվանից։ Եթե ընտանիքի բոլոր անդամները լքեն երկիրը, նույն ժամկետում կդադարեցվի նաև ընտանիքին տրամադրվող 300 լարիի վճարումը։
Հետևեք մեզ տելեգրամում
