ՌԴ նախագահի մամուլի քարտուղար Դմիտրի Պեսկովը մեկնաբանել է մի շարք երկրների դիվանագետների հայտարարություններն այն մասին, որ չեն պատրաստվում հեռանալ Կիևից՝ չնայած Ռուսաստանի ԱԳՆ-ի նախազգուշացումներին։ Նա նշել է, որ Ռուսաստանը շարունակում է ռազմական գործողությունները, իսկ օտարերկրյա քաղաքացիների՝ Ուկրաինայում մնալու կամ հեռանալու որոշումը տվյալ երկրների գործն է։ Այս մասին գրել է «РБК»-ն։
Ռուսաստանի ԱԳՆ-ն հոկտեմբերի 3-ին կրկին կոչ էր արել օտարերկրյա քաղաքացիներին, այդ թվում՝ դիվանագիտական ներկայացուցչությունների աշխատակիցներին, չմեկնել Ուկրաինա և այնտեղ չմնալ։ Գերատեսչությունը հայտարարել էր, որ ռուսական զինված ուժերը շարունակելու են հարվածներ հասցնել Կիևում և Ուկրաինայի այլ քաղաքներում ռազմական նշանակության օբյեկտներին։ Նման նախազգուշացում Ռուսաստանի ԱԳՆ-ն արել էր նաև մայիսի 25-ին։
Այս ֆոնին հոկտեմբերի սկզբին «The Guardian»-ը հայտնել էր, որ Կիևում արևմտյան դիվանագետները քննարկում են իրավիճակի վատթարացման դեպքում գործողությունների տարբերակները, այդ թվում՝ դեսպանատների հնարավոր տեղափոխումը։ Ուկրաինայի ԱԳՆ-ն, սակայն, հերքել էր այդ տեղեկությունը։
Միաժամանակ, դեռ մայիսին ԵՄ արտաքին գործերի և անվտանգության քաղաքականության բարձր ներկայացուցիչ Կայա Կալլասը հայտարարել էր, որ ԱՄՆ դեսպանատունը կլքի Կիևը, իսկ Եվրամիության երկրների դիվանագիտական ներկայացուցչությունները կշարունակեն աշխատել Ուկրաինայի մայրաքաղաքում։ Այս հայտարարությունների ֆոնին Պեսկովը նշել է, որ օտարերկրյա դիվանագետների՝ Կիևում մնալու կամ հեռանալու որոշումը տվյալ երկրների գործն է։
Հետևեք մեզ տելեգրամում
