Գերմանիայի Դաշնային հետախուզական ծառայության (BND) նախկին ղեկավար Օգուստ Հանինգը ձերբակալվել է լրտեսության, պետական դավաճանության և օտարերկրյա հետախուզական ծառայությունների հետ համագործակցության կասկածանքով։ Այս մասին հայտնել է Գերմանիայի դաշնային դատախազությունը, փոխանցում է AFP-ն։
Դատախազությունը չի հայտնել, թե օտարերկրյա որ պետությունների հետ է կապվում գործը։ AFP-ի տեղեկություններով՝ դրանց թվում Ռուսաստանը չէ։ Գերմանական Der Spiegel ամսագիրը, հղում անելով անանուն աղբյուրների, հայտնել է, որ Հանինգը կապի մեջ է եղել Ադրբեջանի հետախուզության ներկայացուցչի հետ։
80-ամյա Հանինգը BND-ն ղեկավարել է 1998-2005 թվականներին։ Գերմանիայի դաշնային դատախազության տվյալներով՝ նա իր նախկին աշխատակից Մանֆրեդ Դ.-ից ստացել է գաղտնի տեղեկություններ և դրանց հիման վրա նյութեր պատրաստել օտարերկրյա հետախուզական ծառայության ներկայացուցչի համար։
Մանֆրեդ Դ.-ն նույնպես ձերբակալվել է։ Նա մինչև 2026 թվականի մարտը շարունակել է աշխատել BND-ում և, ըստ քննության, իր պաշտոնի շնորհիվ հասանելիություն է ունեցել գաղտնի տեղեկությունների։ Քննիչների տվյալներով՝ նա Հանինգին գումարի դիմաց փոխանցել է մոտ 2000 փաստաթուղթ, որոնցից շատերը եղել են գաղտնի և նախատեսված միայն ծառայության ներքին օգտագործման համար։
Գերմանիայի հանրային հեռարձակողների միավորման (ARD) հաղորդմամբ ՝ փաստաթղթերում տեղեկություններ են եղել նաև Իրանի միջուկային ծրագրի և Ռուսաստանի զինված ուժերի վերաբերյալ։ Դրանց մի մասը, ըստ աղբյուրի, ստացվել է նաև Գերմանիայի գործընկեր երկրների հետախուզական ծառայություններից։
Հետևեք մեզ տելեգրամում
