Իսրայելի վարչապետ Բենիամին Նեթանյահուն հայտարարել է, որ ցանկանում է խուսափել Թուրքիայի հետ ուղիղ ռազմական բախումից, սակայն Իսրայելը պատրաստվում է հնարավոր բոլոր սցենարներին։ Նա Թուրքիայի նախագահ Ռեջեփ Թայիփ Էրդողանին մեղադրել է Իսրայելի ոչնչացման մասին հայտարարություններ անելու և Երուսաղեմի նկատմամբ հավակնություններ ունենալու մեջ։ Այս մասին հայտնել է «The Jerusalem Post»-ը։
Նեթանյահուի խոսքով՝ Էրդողանի հայտարարությունները թշնամական են, և Իսրայելը հաշվի է առնում հնարավոր զարգացումները։ Միաժամանակ նա նշել է, որ կցանկանար վերականգնել Իսրայելի և Թուրքիայի միջև նախկինում եղած սերտ հարաբերությունները, սակայն կասկածում է, որ դա հնարավոր կլինի Էրդողանի իշխանության օրոք։
Հոկտեմբերի 19-ին Թուրքիայի նախագահը, իր հերթին, մեղադրել է Իսրայելին Սիրիայում իրավիճակն ապակայունացնելու փորձերի մեջ։ Էրդողանի խոսքով՝ Սիրիայում դրական զարգացումներ կան, սակայն Իսրայելը փորձում է խոչընդոտել տարածաշրջանի կայունությանը։ Նա նաև հայտարարել է, որ Թուրքիան շրջապատված է «կրակի օղակով», և իր կառավարությունն աշխատում է երկիրը վտանգներից պաշտպանելու ուղղությամբ։ Էրդողանի ելույթի մասին հոկտեմբերի 20-ին գրել է «The Jerusalem Post»-ը։
Հետևեք մեզ տելեգրամում
