Թուրքիան Լիբիայում վտանգավոր խաղ է խաղում։ Այս մասին հայտարարել է Ֆրանսիայի նախագահ Էմանուել Մակրոնը Թունիսի առաջնորդ Քայս Սաիդի հետ համատեղ մամուլի ասուլիսի ժամանակ։
«Այսօր Թուրքիան Լիբիայում վտանգավոր խաղ է խաղում։ Դա ամբողջովին հակասում է Բեռլինի համագումարի ժամանակ նրա ստանձնած պարտավորություններին, և ես առիթ եմ ունեցել այդ մասին բացեիբաց հայտնել նախագահ Ռեջեփ Թայիփ Էրդողանին»,- ասել է Ֆրանսիայի նախագահը։
Մակրոնն անդրադարձել է նաև օրեր առաջ Միջերկրական ծովում թուրքական ու ՆԱՏՕ-ի հատուկ գործողության մասնակից Ֆրանսիական նավի միջև արձանագրված միջադեպին։ Այս առիթով Ֆրանսիայի նախագահը կրկնել է դեռևս անցյալ տարի ՆԱՏՕ-ի վերաբերյալ արած արտահայտությունը ասելով, որ այդ միջադեպն ապացուցեց, որ դաշինքի ուղեղը մահացել է։
Հիշեցնենք, որ հունիսի 10-ին Ֆրանսիայի պաշտպանության նախարարը հայտարարել էր, որ Լիբիայի ափերի մոտ թուրքական ռազմանավը հրաժարվել է կատարել ՆԱՏՕ-ի հատուկ գործողությանը մասնակցող ֆրանսիական նավից հնչած՝ բեռները ստուգելու պահանջը։ Ավելին, թուրքական նավը նույնիսկ իր թիրախի տակ է վերցրել ֆրանսիական նավին։
ՆԱՏՕ-ն այդ դեպքի առնչությամբ հետաքննություն է սկսել։
Հետևեք մեզ տելեգրամում
