Այն երկրները, որոնց քաղաքացիները 2020թ․ հունվարին զոհվել են Թեհրանի մերձակայքում ուկրաինական ուղևորատար ինքնաթիռի կործանման պատճառով, համատեղ բանակցություններ կվարեն Իրանի հետ՝ զոհվածների հարազատներին փոխհատուցում վճարելու հարցով։
Այս մասին հուլիսի 2-ին հայտնել է Շվեդիայի ԱԳ նախարար Էնն Լինդեն՝ Ուկրաինայի, Կանադայի, Մեծ Բրիտանիայի և Աֆղանստանի ներկայացուցիչների հետ հանդիպումից հետո։ Էնն Լինդեն նշել է, որ որևէ կասկած չունի այն հարցում, որ Իրանը կվճարի պահանջվող փոխհատուցումը։ Ինչպես հայտնի է՝ ավելի վաղ Իրանն առաջարկել էր 80․000-ական դոլար վճարել զոհվածների ընտանիքներին, բայց Ուկրաինան նման փոխհատուցումը բավարար չէր համարել։
Վերոնշյալ երկրների նախարարները փոխհատուցման վերաբերյալ բանակցություններում համագործակցության և փոխըմբռնման հուշագիր են ստորագրել։ Այս տեղեկությունը հաստատել է նաև Ուկրաինայի ԱԳ նախարար Դմիտրի Կուլեբան։ Առաջիկայում ակնկալվում է այդ երկրների ներկայացուցիչների մասնակցությամբ առաջին համատեղ հանդիպումը Իրանի հետ։
Հիշեցնենք, որ «Ուկրաինական միջազգային ավիաուղիներին» պատկանող Boeing 737-800 ուղևորատար ինքնաթիռը կործանվել էր հունվարի 8-ի առավոտյան՝ Թեհրանի օդանավակայանից օդ բարձրանալուց րոպեներ անց։ Օդանավում գտնվող բոլոր 167 ուղևորները և անձնակազմի 9 անդամները զոհվել էին։ Նրանք 6 երկրների քաղաքացիներ էին։ Կարճ ժամանակ անց Իրանի իշխանությունները խոստովանեցին, որ ինքնաթիռն անզգուշաբար խոցվել է իրանական կողմի սխալի պատճառով, քանի որ այն որպես թշնամական օբյեկտ էր ընկալվել։
Հետևեք մեզ տելեգրամում
