Սիրիայի ժողովրդական ժողովի (խորհրդարան) նախագահ Համուդա Սաբբաղը ընդունել է Դամասկոսում ՀՀ դեսպան Տիգրան Գևորգյանին: Հանդիպման ընթացքում Սաբբաղը կարևորել է Սիրիա-Հայաստան խորհրդարանական կապերի և փոխայցելությունների խորացումը` կոչ անելով բոլոր բնագավառներում զարգացնել երկկողմ հարաբերությունները երկու բարեկամ երկրների միջև:
Տիգրան Գևորգյանը, իր հերթին, հաստատել է, որ հայ-սիրիական հարաբերությունները պատմական արմատներ ունեն և մշտապես թարմացվում են, աշխատանքներ պետք է տարվեն խորհրդարանական հարաբերությունները զարգացնելու համար՝ նշելով, որ Սիրիա կայցելի Հայաստանի խորհրարանի պատվիրակությունը՝ սիրիահայ գործարարների ուղեկցությամբ, սակայն այս պահին խոչընդոտում է կորոնավիրուսի համավարակը:
Տիգրան Գևորգյանը Համուդա Սաբբաղին է փոխանցել նաև ՀՀ ԱԺ նախագահ Արարատ Միրզոյանի՝ Ժողովրդական ժողովի նախագահի պաշտոնում վերընտրվելու կապակցությամբ շնորհավորական նամակը, որում Միրզոյանը վստահություն է հայտնել, որ համատեղ ջանքերի շնորհիվ երկու երկրների խորհրդարանականներն արդյունավետ կհամագործակցեն՝ ի շահ երկու ժողովուրդների:
Հանդիպմանը ներկա էին նաև Դամասկոսում ՀՀ դեսպանության առաջին խորհրդականը և Սիրիայի խորհրդարանի մի շարք պատգամավորներ:
Հետևեք մեզ տելեգրամում
