Վրաստանի նախագահ Սալոմե Զուրաբիշվիլին հոկտեմբերի 31-ին խորհրդարանի ընտրություններ անցկացնելու մասին հրաման է ստորագրել:
«Մեր երկրում խորհրդարանական ընտրությունները տեղի կունենան հոկտեմբերի 31-ին, այդպես է սահմանված մեր Սահմանադրությամբ: Ուզում եմ դիմել մեր հանրությանը և կոչ անել հնարավորինս խաղաղ անցկացնել այդ երկու ամիսները»,-նշված է նախագահի գրասենյակի տարածած հաղորդագրության մեջ:
Նշենք, որ Վրաստանի Սահմանադրության համաձայն՝ խորհրդարանական հերթական ընտրությունները պետք է տեղի ունենան նախորդ գումարման խորհրդարանի լիազորությունների ավարտի տարվա հոկտեմբերի վերջին շաբաթ օրը:
Վրաստանի խորհրդարանը բաղկացած է 150 պատգամավորից: 2020թ. ընտրություններն ակցկացվելու են խառը համակարգով. 120 պատգամավոր ընտրվելու է համամասնական ընտրակարգով, 30-ը՝ մեծամասնական։ Մեծամասնական ընտրատարածքներում հաղթող է ճանաչվում 50%-ից ավել ձայն հավաքած թեկնածուն: Եթե թեկնածուներից ոչ մեկը չի հաղթահարում անցողիկ շեմը, նշանակվում է երկրորդ փուլ: Կուսակցությունների համար անցողիկ շեմը լինելու է 1%-ը, իսկ դաշինքների համար՝ այնքան տոկոս, որքան սուբյեկտ կա դաշինքի մեջ: Կառավարություն ձևավորելու համար կուսակցությունը պետք է հավաքի 40,54%-ից ոչ պակաս ձայն:
Հետևեք մեզ տելեգրամում
