Իրանի և Ռուսաստանի միջև համագործակցությունը հասել է աննախադեպ մակարդակի։ Այս մասին հայտարարել է Իրանի արտաքին գործերի նախարար Աբբաս Արաղչին՝ հոկտեմբերի 19-ին Թեհրանում Ռուսաստանի ԱԳ նախարար Սերգեյ Լավրովի հետ հանդիպումից հետո, հաղորդում է «AFP» գործակալությունը։
Արաղչիի խոսքով՝ հանդիպման ընթացքում քննարկվել են Եվրոպային և Արևմտյան Ասիային վերաբերող հարցեր, այդ թվում՝ իրավիճակը Լիբանանում, Պաղեստինում, Ուկրաինայում և Եմենում։ Նախարարները քննարկել են նաև տնտեսական և միջուկային համագործակցության ընդլայնումը։
Հանդիպմանն անդրադարձ է եղել նաև Հարավային Կովկասին: Ընդգծելով Հարավային Կովկասի մարտահրավերները տարածաշրջանային մակարդակով լուծելու անհրաժեշտությունը՝ Լավրովը նշել է, որ Իրանը և Ռուսաստանը համագործակցում են «3+3» տարածաշրջանային մեխանիզմի առաջմղման և ակտիվացման ուղղությամբ։
«Մենք կարող ենք այս շրջանակում հավաքվել և, հենվելով վեց երկրների հավաքական ներուժի վրա՝ արդյունավետ քայլեր ձեռնարկել տարածաշրջանի անվտանգության բարձրացման, խաղաղության ամրապնդման և կայուն զարգացման ուղղությամբ»,- նշել է ՌԴ ԱԳ նախարարը։
Հետևեք մեզ տելեգրամում
