Թուրքիայի նախագահ Ռաջեփ Թայիփ Էրդողանը հերթական անգամ դատական կարգով բարոյական փոխհատուցում է պահանջել ընդդիմադիր «Ժողովրդահանրապետական» կուսակցության (ԺՀԿ-CHP) նախագահ Քեմալ Քըլըչդարօղլուից։
Անկարայի առաջին ատյանի քաղաքացիական դատարան ներկայացված հայցով ընդդիմադիր գործչից 250․000 թուրքական լիրայի (շուրջ 4․330 ԱՄՆ դոլար) փոխհատուցում է պահանջվել՝ նոյեմբերի 26-ին մեջլիսի կուսակցական խմբի նիստի ժամանակ Էրդողանին հայրենիքի դավաճան անվանելու համար։
Քըլըչդարօղլուն իր ելույթում մասնավորապես ասել էր․ «Սեփական զենքի գործարանը օտար բանակին նվիրաբերողներին աշխարհի բոլոր ծայրերում հայրենիքի դավաճան են անվանում։ Նույնն էլ ես եմ ասում։ Նա անգամ չի համարձակվում դատական հայց ներկայացնել ․․․ Էրդողանը հայտարարել է, թե «Քըլըչդարօղլուի դեմ փոխհատուցման հայցեր եմ ներկայացրել ու բոլոր դատական գործերը շահել եմ»։ Իսկ Մեն կղզու գործն էլ ես եմ շահել, դրան ի՞նչ կասես։ Ուրեմն՝ ճիշտ է այն հանգամանքը, որ փողեր ես տարել»։
Հիշեցնենք, որ Քեմալ Քըլըչդարօղլուն Թուրքիայի պատմության մեջ ռեկորդակիր է՝ Էրդողանին վիրավորելու համար իր դեմ հարուցված դատական գործերի թվի և ըստ այդմ դատարանի կողմից նշանակված փոխատուցումների գումարի առումով։
Միայն Մեն կղզում Էրդողանի և նրա ընտանիքի անդամների անունով հիմնված կեղծ ընկերության հաշվին խոշոր գումարների փոխանցման վերաբերյալ տարբեր տարեթվերի արված հայտարարությունների համար Քըլըչդարօղլուի դեմ մի քանի դատական գործեր էին հարուցվել։ Դրանց շրջանակներում թուրքական դատարանները ընդդիմադիր գործչին պարտավորեցրել էին գրեթե մեկ միլիոն լիրայի բարոյական փոխհատուցում վճարել Էրդողանին։ Սակայն 2019թ․ նոյեմբերի 8-ին հայտնի դարձավ, որ Ստամբուլի վերաքննիչ դատարանը չեղարկել է Մեն կղզու մասին հայտարարությունների գործով փոխհատուցում գանձելու մասին առաջին ատյանի դատարանի վճիռը։
Հետևեք մեզ տելեգրամում
