Ամերիկյան Viasat ընկերությունն ամերիկահայերին վստահեցրել է, որ դադարեցնում է բոլոր մատակարարումները Թուրքիա: Ընկերության արտադրանքն օգտագործվել է «Բայրաքթար» անօդաչու թռչող սարքերի համար: Ամերիկահայերը բողոքի ակցիա են իրականացրել ընկերության շենքի առաջ, և նրանցից մի քանիսը մուտք է գործել ընկերության տարածք՝ բանակցությունների նպատակով:
Ակտիվիստ Քրիստինե Հալաջյանը Viasat-ի ներկայացուցիչ Քեն Պետերմանի հետ հանդիպումից հետո տեղեկացրել է, որ վերջինս նշել է՝ տեղյակ չեն եղել իրենց արտադրանքի՝ ահաբեկիչների կողմից օգտագործման մասին: Ըստ Հալաջյանի՝ Պետերմանը հավելել է, որ Viasat-ը դադարեցնում է մատակարարումները Թուրքիային և պաշտոնական Վաշինգտոնից բացատրություններ կպահանջի:
«Նրանք այլևս չեն ստանա մեր արտադրանքը, ես շատ շնորհակալ եմ այս խաղաղ բողոքի ակցիաների համար, որ այդ ահաբեկչությունը դադարեցվի»,-Viasat ընկերության ներկայացուցիչն ասել է հայ ակտիվիստին, որի բնորոշմամբ՝ սա իրականում մեծ ձեռքբերում է և շնորհիվ Կալիֆոռնիայի հայերի ջանքերի՝ այդ ռազմական տեխնիկան այլևս չի մատակարարվի Թուրքիային:
Ակնկալվում է, որ ընկերությունը պաշտոնական հայտարարությամբ հանդես կգա: Viasat-ի ներկայացուցչից` Պետերմանից, ամերիկահայերի ակցիայի ընթացքում հարցազրույց էր վերցնում FOX5 հեռուստաալիքը:
Հետևեք մեզ տելեգրամում
