Թբիլիսիում՝ Վրաստանի խորհրդարանի հարակից տարածքում, Վրաստանի ընդդիմադիր կուսակցությունների ու քաղաքացիական հատվածի ներկայացուցիչներն այսօր մեծամասշտաբ ցույց էին կազմակերպել, որն ավելի ուշ տեղափոխել են Կենտրոնական ընտրական հանձնաժողովի շենքի մոտ, հայտնում է aliq.ge-ն:
Ցուցարարները Վրաստանի իշխանությանը մինչև ժամը 20:00-ն ժամանակ էին տվել՝ ԿԸՀ-ի նախագահ Թամար Ժվանիային պաշտոնանկ անելու ու նոր ընտրական հանձաժողովի կազմ ձևավորելու համար:
ԿԸՀ-ի գլխավոր գրասենյակի մոտ մոբիլիզացված են հատուկ ջոկատայիններ: Ոստիկանությունը ջրցան մեքենա և, հավանաբար, արցունքաբեր գազ է կիրառել ցուցարարների դեմ:
Ընդդիմության պահանջներն են.
- Նոր, արդար և ազատ խորհրդարանական ընտրությունների անցկացում,
- ԿԸՀ-ի նախագահի հրաժարական և նոր ընտրական հանձնաժողովի ձևավորում,
- Բոլոր քաղբանտարկյալների ազատ արձակում:
Հիշեցնենք, որ հոկտեմբերի 31-ին Վրաստանում կայացած խորհրդարանական ընտրություններից հետո երկրում ցույցեր են սկսվել: Խորհրդարանական ընտրությունների արդյունքները չեն ճանաչում ընտրական շեմը հաղթահարած բոլոր 8 ընդդիմադիր կուսակցությունները:
Հետևեք մեզ տելեգրամում
