Թուրքիայի նախագահ Ռեջեփ Թայիփ Էրդողանը խորհրդարան է ներկայացրել Ադրբեջան զինվորականներ ուղարկելու օրենքի նախագիծը: Թուրք զինվորականներն այնտեղ կմեկնեն Ադրբեջանի պահանջով և Ռուսաստանի հետ ԼՂ-ում խաղաղության վերահսկման մոնիթորինգի համատեղ կենտրոն ստեղծելու վերաբերյալ համաձայնության շրջանակում:
«Կենտրոնում գործելու են զինվորականներ, իսկ ըստ անհրաժեշտության՝ քաղաքացիական մասնագետներ: Կենտրոնի նպատակն է Հարավային Կովկասում ապահովել խաղաղություն և կայունություն՝ Ադրբեջանի տարածքային ամբողջականության շրջանակում, որն արտացոլված է ՄԱԿ ԱԽ և ԵԱՀԿ բանաձևերում»,-նշված է փաստաթղթում:
Նշվում է նաև, որ Ադրբեջան թուրք զինվորականներ ուղարկելը «համապատասխանում է Թուրքիայի ազգային շահերին»:
Խաղաղապահ կենտրոնի տեղը կորոշի Ադրբեջանը, իսկ զինվորականների թիվը, նրանց առաքելությունը և ժամանելու ժամկետները՝ Թուրքիայի նախագահականը:
ՌԴ նախագահի մամուլի խոսնակ Դմիտրի Պեսկովն Էրդողանի այս առաջարկն անվանել է Անկարայի ներքին գործը: Նրա խոսքով, Ադրբեջանի տարածքում լինելու է մոնիթորինգի կենտրոն և «այնտեղ թուրք զինվորականներ պետք է ուղարկվեն»:
Հետևեք մեզ տելեգրամում
