ԵԱՀԿ Մինսկի խմբի համանախագահ երկրների պատվիրակությունների ղեկավարները՝ Ռուսաստանի Դաշնության արտաքին գործերի նախարար Սերգեյ Լավրովը, ԱՄՆ պետքարտուղարի տեղակալ Սթիվեն Բիգընը և Ֆրանսիայի արտաքին գործերի նախարար Ժան-Իվ Լե Դրիանը հանդես են եկել համատեղ հայտարարությամբ։
Նրանք ողջունել են Լեռնային Ղարաբաղի հակամարտության տարածքում ռազմական գործողությունների դադարեցումը` համաձայն Ադրբեջանի Հանրապետության նախագահի, Հայաստանի Հանրապետության վարչապետի և Ռուսաստանի Դաշնության նախագահի 2020 թվականի նոյեմբերի 9-ի հայտարարության:
ԵԱՀԿ Մինսկի խմբի համանախագահ երկրները Հայաստանին և Ադրբեջանին կոչ են արել շարունակել կատարել իրենց պարտավորությունները Լեռնային Ղարաբաղում և հարակից շրջաններում՝ հրադադարի վերաբերյալ իրենց նախկին ստանձնած պարտավորությունների ու նոյեմբերի 9-ի հայտարարության համաձայն: Համանախագահ երկրները կարևորել են Ռուսաստանի Դաշնության կողմից Ադրբեջանի և Հայաստանի հետ համաձայնեցված միջոցառումների իրականացումը՝ ռազմական գործողությունների չվերսկսումը երաշխավորելու համար: Նրանք նաև կոչ են արել լիարժեք ու արագ հեռացնել բոլոր օտարերկրյա վարձկաններին տարածաշրջանից և հորդորել բոլոր կողմերին նպաստել դրան:
«Համանախագահ երկրները հիշեցրել են Հայաստանին և Ադրբեջանին միջազգային մարդասիրական իրավունքի պահանջները կատարելու իրենց պարտավորության մասին, մասնավորապես՝ ռազմագերիների փոխանակման և դիերի վերադարձի հետ կապված: Նրանք ընդգծել են Լեռնային Ղարաբաղի հակամարտությունից տեղահանված մարդկանց կամավոր, անվտանգ, արժանապատիվ և կայուն վերադարձի պայմանների երաշխավորման կարևորությունը, այդ թվում`վերջին ռազմական գործողությունների ընթացքում: Շեշտվել է պատմական և կրոնական ժառանգության պաշտպանության կարևորությունը Լեռնային Ղարաբաղում և նրա շրջակայքում: Համանախագահ երկրները կոչ են արել Ադրբեջանին և Հայաստանին լիարժեք համագործակցել համապատասխան միջազգային կազմակերպությունների հետ՝ այդ ոլորտներում իրենց պարտավորությունները կատարելու և մարդասիրական հասանելիությունն ապահովելու համար:
Համանախագահ երկրները հորդորել են Հայաստանին և Ադրբեջանին օգտվել գործող հրադադարից` համանախագահների հովանու ներքո բանակցություններ վարելու կայուն խաղաղության վերաբերյալ: Այդ համատեքստում համանախագահ երկրները հորդորել են կողմերին տարածաշրջանում հնարավորինս շուտ ընդունել համանախագահներին և պարտավորվել առարկայական բանակցություններ վարել բոլոր չլուծված խնդիրները լուծելու համար`ըստ համաձայնեցված ժամանակացույցի:
Հետևեք մեզ տելեգրամում
