Դեկտեմբերի 12–ին Ադրբեջանում պաշտոնապես մեկնարկել է արտահերթ խորհրդարանական ընտրությունների քարոզարշավը։ Այս մասին հայտարարել է Ադրբեջանի փոխվարչապետ, իշխող «Նոր Ադրբեջան» («Յենի Ազերբայջան») կուսակցության փոխնախագահ և գործադիր քարտուղար Ալի Ահմեդովը։
Նրա խոսքով՝ թեկնածուների ցուցակում տեղ են գտնելու ինչպես նախկին խորհրդարանի անդամներ, ճանաչված դեմքեր, այնպես էլ նոր անուններ։ Ակնկալվում է, որ նոր խորհրդարանում զգալի տեղ կտրվի առավել երիտասարդ կադրերին։
Ադրբեջանական «Trend» լրատվական գործակալության փոխտնօրեն Արզու Նագիևի կարծիքով՝ խորհրդարանական արտահերթ ընտրությունները անխուսափելի էին․ «Կարծում եմ՝ օրենսդրության բոլոր ոլորտներում շեշտը կդրվի նոր մասնագետների ներգրավման վրա, որոնք լավ գիտեն իրենց գործը, այդ թվում՝ Ղարաբաղյան հակամարտությունը՝ որպես թե արտաքին, թե ներքին քաղաքականության առաջնային ուղղություն», – հայտարարել է նա։
Հիշեցնենք, որ իշխող «Նոր Ադրբեջան» կուսակցության որոշման հիման վրա Ադրբեջանի խորհրդարանը դեկտեմբերի 2-ին հայտարարել էր ինքնալուծարման մասին, իսկ մեջլիսի խոսնակ Օքթայ Ասադովը գրավոր դիմել էր երկրի նախագահին՝ նոր ընտրություններ նշանակելու համար։ Դեկտեմբերի 4-ին Ադրբեջանի Սահմանադրական դատարանը, ի պատասխան նախագահի դիմումի, սահմանել էր, որ խորհրդարանի ինքնալուծարման որոշումը համապատասխանում է երկրի սահմանադրությանը։ Հաջորդ օրը Իլհամ Ալիևը ստորագրեց խորհրդարանի արձակման և 2020թ փետրվարի 9-ին նոր խորհրդարանական ընտրությունների անցկացման մասին հրամանագիրը։
Հետևեք մեզ տելեգրամում
