Հայաստանը բանակցություններ է սկսել՝ Իրանի միջնորդությամբ թուրքմենական գազ գնելու նպատակով։ Այս մասին ՀՀ Ազգային ժողովում հայտարարել է Ազգային ժողովի տարածաշրջանային և եվրասիական ինտեգրման հարցերի մշտական հանձնաժողովի նախագահ Միքայել Մելքումյանը։
Նա տեղեկացրել է, որ վերջերս Իրան այցելած ՀՀ տարածքային կառավարման և ենթակառուցվածքների նախարարը հանդիպել է Իրանի էներգետիկայի նախարարի հետ։ «Հարցը քննարկման փուլում է։ Դրա նպատակներից մեկը Թուրքմենստանից Իրանի, Հայաստանի, Վրաստանի տարածքով դեպի Ռուսաստան ընդհանուր էներգետիկ միջանցք ստեղծելն է», – նշել է Մելքումյանը։
Նրա խոսքով` Իրանը հետաքրքրված է այդ նախագծի իրագործմամբ։ Ընդգծելով, որ այս պահին Հայաստանը Իրանից երեք անգամ ավելի քիչ գազ է ստանում, քան թույլ է տալիս գազատարի թողունակությունը, Մելքումյանը հույս է հայտնել, որ Իրան –Հայաստան էլեկտրահաղորդման նոր գծի շինարարությունը թույլ կտա ամբողջությամբ գործարկել գազատարը (քանի որ Հայաստանն Իրանից վառելիքը ստանում է «գազ էլեկտրականության դիմաց» սկզբունքով)։
Հայաստանը մտադիր է թուրքմենական գազը գնել սվոփ գործարքի միջոցով, այսինքն՝ Թուրքմենստանը վառելիքը կառաքի Իրանի հյուսիսային նահանգներ, իսկ Իրանը իր գազը կմատակարարի Հայաստանին։
Նշենք, որ Իրան–Հայաստան գազատարի թողունակությունը տարեկան մոտ 2,2 միլիարդ խորանարդ մետր է։ Ներկա պահին օգտագործվում են դրանից 365-370 միլիոնը:
Հետևեք մեզ տելեգրամում
