Իրանի հետ բանակցությունների ամեն օր ձգձգումը Թեհրանին մոտեցնում է միջուկային զենքի ստեղծմանը, և Իսրայելը իրեն իրավունք է վերապահում ցանկացած պահի և ցանկացած եղանակով դա կանխել: Այս մասին հայտարարել է Իսրայելի ԱԳՆ ղեկավար Լապիդը Վաշինգտոնում ԱՄՆ պետքարտուղար Բլինկենի և ԱՄԷ-ի արտգործնախարար Աբդուլլահ Ալ-Նահյանի հետ համատեղ մամուլի ասուլիսի ժամանակ:
Ըստ Լապիդի՝ եթե Իրանը չվերադառնա միջուկային ծրագրի շուրջ 2014 թվականի Վիեննայի բանակցություններին, ապա Իսրայելը կարող է դիտարկել այլ տարբերակներ:
«Եթե դիվանագիտությունը ձախողվի, ապա այլ տարբերակներ կքննարկվեն: Այլ տարբերակներ ասելով, կարծում եմ՝ թե՛ այստեղ, թե՛ Թեհրանում, թե՛ Իսրայելում, թե՛ Էմիրություններում, բոլորը հասկանում են թե ինչ նկատի ունենք: Իրանի ռեժիմը հրապարակավ հայտարարել է, որ ցանկանում է մեզ ջնջել երկրի երեսից: Մենք չենք պատրաստվում դա թույլ տալ»,- հայտարարել է Լապիդը:
Նրա խոսքով՝ մինչ աշխարհը սպասում է, որ Իրանը վերադառնա բանակցությունների սեղանի շուրջ, նրանք հարստացնում են ուրանը և զարգացնում բալիստիկ հրթիռների իրենց ծրագիրը:
Ըստ Լապիդի՝ Իրանը կանգնած է միջուկային պետություն դառնալու նախաշեմին:
Պետքարտուղար Բլինկենը իր հերթին նույնպես ընդգծել է, որ եթե Իրանը չփոխի իր մոտեցումները, կիրառվելու են «այլ տարբերակներ»:
Օրեր առաջ՝ հոկտեմբերի 12-ին ԱՄՆ նախագահի ազգային անվտանգության հարցերով խորհրդական Ջեյք Սալիվանը Լապիդի հետ երկկողմ հանդիպման ժամանակ շեշտել էր «այլ տարբերակների» անհրաժեշտությունը, եթե դիվանագիտական միջոցները սպառվեն:
Հիշեցնենք նաև, որ ավելի վաղ՝ հոկտեմբերի 6-ին Իրանի ԱԳ նախարար Հոսեյն Աբդոլլահիանը հայտարարել էր, որ Իրանը «շուտով» վերադառնալու է միջուկային ծրագրի շուրջ 2014 թվականի Վիեննայի բանակցություններին:
Հետևեք մեզ տելեգրամում
