Թուրքիայի աջակցությունը վայելող սիրիական խմբավորումները իրենց վերահսկողության տակ գտնվող Աֆրինում զորավարժություններ են անցկացրել՝ ցուցադրելով Անկարայից Հալեպ տեղափոխված նոր սպառազինությունների տարբեր տեսակները և ժամանակակից ռազմական տեխնիկան: Այս մասին տեղեկացնում են տեղական աղբյուրները:
Ընդ որում զորավարժություններն անցկացվում են Սիրիայում քուրդ զինյալների դեմ Թուրքիայի հնարավոր նոր ռազմական գործողության ֆոնին:
«Համագործակցելով մեր թուրք եղբայրների հետ՝ մենք ավարտեցինք մեր մարտիկների ռազմական, հոգեբանական, նյութատեխնիկական նախապատրաստումը ռազմական օպերացիան սկսելու համար»,- հայտարարել է «Սիրիայի ազատագրման ճակատ»-ի ցամաքային զորքերի հրամանատար Հուսեյն Ալ-Ահմադ Աբու Ալին:
Հիշեցնենք, որ Թուրքիան պատրաստվում է ռազմական նոր գործողություն իրականացնել Սիրիայի հյուսիսում՝ քրդերի դեմ: Ավելի վաղ սիրիական ընդդիմադիր աղբյուրները հաղորդել էին, որ թուրքական ռազմական նոր գործողությունը սկսվելու է երեքշաբթի օրը: Հնարավոր նոր ռազմական գործողությունը անցկացվելու է մի քանի ուղղություններով՝ Ազազի և Թել Աբյադի:
Նշենք, որ Մարդու իրավունքների սիրիական դիտարանը հաղորդել էր, որ թուրքական սպառնալիքների ֆոնին սիրիական վարչակարգը նույնպես մեծաքանակ ուժեր է կուտակել Հալեպի հյուսիսարևելյան հատվածում: Մասնավորապես, ռուսական զինված ուժերը սիրիական բանակի հետ լրացուցիչ ռազմական ուժեր են տեղակայել Ալ-Ռաքքա նահանգի Այն Իսսա ռազմաբազայում:
Թուրքական լրատվամիջոցներն էլ իրենց հերթին տեղեկացնում են, որ Ռուսաստանը Սիրիայում Թուրքիայի սահմանից 3 կմ հեռավորության վրա տեղակայել է հրթիռներով զինված կործանիչներ:
Հետևեք մեզ տելեգրամում
