Լիբանանի վարչապետ Նաջիբ Միկաթին այսօր՝ նոյեմբերի 4-ին Բեյրութի Բաաբդայի պալատում հանդիպել է երկրի նախագահ Միշել Աունի հետ: Նրանք քննարկել են Պարսից ծոցի երկրների հետ առաջացած դիվանագիտական ճգնաժամից դուրս գալու հնարավոր տարբերակները և համաձայնության են եկել, հաղորդում է Լիբանանի նախագահի աշխատակազմը՝ առանց մանրամասնություններ ներկայացնելու:
Նշենք, որ Լիբանանի տեղեկատվության նախարար Ժորժ Կորդահիի հայտարարությունը հանգեցրել է դիվանագիտական ճգնաժամի Լիբանանի և Պարսից ծոցի երկրների միջև: Նախքան տեղեկատվության նախարարի պաշտոնում նշանակվելը՝ Կորդահին Al Jazeera-ին հարցազրույցում ասել էր, որ Եմենի հութիները պաշտպանում են իրենց երկիրը Սաուդյան Արաբիայի գլխավորած արաբական կոալիցիայի արտաքին սպառնալիքներից և ագրեսիայից:
Ի պատասխան այս հայտարարության՝ Սաուդյան Արաբիան հետ է կանչել իր դեսպանին Բեյրութից: Սաուդյան Արաբիային են հետևել նաև Պարսից ծոցի մյուս երկրները:
Կատարն իր հերթին փորձում է որպես միջնորդ հանդես գալ Լիբանանի և Պարսից ծոցի երկրների միջև՝ լարվածության թուլացման համար:
Հիշեցնենք, որ ավելի վաղ Լիբանանի արտգործնախարար Աբդալլահ Բու Հաբիբը կոչ է արել Պարսից ծոցի համագործակցության խորհրդի երկրներին խնդիրը լուծել «երկխոսության միջոցով»։ Մինչդեռ Հեզբոլլահի գլխավոր քարտուղարի տեղակալ Նաիմ Կասեմը Սաուդյան Արաբիայի ձեռնարկած քայլերը համարել է «անարդարացի ագրեսիա»:
Հետևեք մեզ տելեգրամում
