Քուվեյթը սահմանափակել է Լիբանանի քաղաքացիներին վիզաների տրամադրումը: Պատճառը՝ Լիբանանի և Պարսից Ծոցի երկրների միջև դիվանագիտական սկանդալն է, գրում են լիբանանյան ԶԼՄ-ները:
«Բանավոր որոշում է կայացվել ավելի խստացնել Լիբանանի քաղաքացիներին տուրիստական և բիզնես վիզաների տրամադրումը»,- AFP-ին հայտնել է մի աղբյուր, որը նախընտրել է անանուն մնալ:
Աղբյուրը տեղեկացրել է, որ պաշտոնական ոչ մի որոշում դեռևս չկա, իսկ Լիբանանի քաղաքացիների համար վիզաների տրամադրումը կասեցված չէ, այլ խստացված է:
Սակայն քուվեյթյան al-Qabas թերթը ավելի վաղ գրել էր, որ Քուվեյթի ներքին գործերի նախարարությունը «դադարեցրել է բոլոր տեսակի վիզաների տրամադրումը Լիբանանի քաղաքացիներին»:
«Այս որոշումը չի տարածվում Լիբանանի այն քաղաքացիների վրա, ովքեր երկրում մնալու կացության իրավունք ունեն, և նրանք իրավունք ունեն վերադառնալ Լիբանան»,- գրել է al-Qabas-ը՝ վկայակոչելով տեղական աղբյուրները:
Հիշեցնենք, որ Լիբանանի և Պարսից Ծոցի համագործակցության խորհրդի երկրների միջև դիվանագիտական ճգնաժամի պատճառ է դարձել Լիբանանի տեղեկատվության նախարար Ժորժ Կորդահիի հայտարարությունը, որով նա քննադատել էր Սաուդյան Արաբիայի քաղաքականությունը Եմենի պատերազմում: Սաուդյան Արաբիան անմիջապես հետ էր կանչել իր դեսպանին Բեյրութից: Նրան հետևել էին նաև Պարսից Ծոցի մյուս երկրները, այդ թվում Քուվեյթը՝ «ի աջակցություն Ռիյադի»:
Հետևեք մեզ տելեգրամում
