Իրաքի արտգործնախարար Ֆուադ Հուսեյնը դեկտեմբերի 23-ին պաշտոնական այցով ժամանել է Թեհրան: Այս մասին տեղեկացնում է իրաքյան INA լրատվական գործակալությունը:
Այցի ընթացում Ֆուադ Հուսեյնը հանդիպել է Իրանի ԱԳ նախարար Հոսեյն Ամիր Աբդոլլահիանի հետ:
Կողմերը քննարկել են երկու երկրների միջև հարաբերությունները բոլոր ոլորտներում, ինչպես նաև համատեղ հետաքրքրության մի շարք հարցեր:
Երկկողմ բանակցություններից հետո նախարարները համատեղ մամուլի ասուլիս են տվել:
Մամուլի ասուլիսի ժամանակ Աբդոլլահիանը բարձր է գնահատել Իրաքի դերն Իրանի և Սաուդյան Արաբիայի միջև երկխոսության գործընթացին աջակցելու համար՝ ավելացնելով, որ Ռիյադի և Թեհրանի միջև բանակցությունների հինգերորդ փուլը շուտով կանցկացվի Բաղդադում:
Ֆուադ Հուսեյնն իր հերթին ընդգծել է, որ Վաշինգտոնի և Թեհրանի միջև լարվածությունն ազդեցություն է ունենում նաև Իրաքի վրա:
Նա կարևորել է Իրանի և ԱՄՆ-ի միջև առանց միջնորդների հանդիպման անհրաժեշտությունը՝ ավելացնելով, որ ամերիկյան և իրանական կողմը վստահում են Իրաքին բանակցություններին աջակցելու տեսանկյունից:
Նշենք, որ Իրաքի արտգործնախարարը պաշտոնական այցի շրջանակներում հանդիպել է նաև Իրանի նախագահ Էբրահիմ Ռայիսիի հետ: Իրանի նախագահն ընդգծել է, որ Իրանի արտաքին քաղաքականության առաջնահերթություններից է Իրաքում անվտանգությանը և կայունությանն աջակցելը:
Հետևեք մեզ տելեգրամում
