Լիբանանի քրիստոնեական «Ազատ հայրենասիրական շարժում» կուսակցությունը հայտարարել է, որ դիտարկում է Հեզբոլլահի հետ քաղաքական դաշինքին վերջ տալու մասին՝ սպառնալով դաշինքի հետագա գոյությանը, որը ձևավորել է Լիբանանի արտաքին քաղաքականությունը 16 տարի շարունակ:
Ավելի վաղ «Ազատ հայրենասիրական շարժում» կուսակցության առաջնորդ Ջեբրան Բասիլը զգուշացրել էր, որ իր կուսակցության դեմ շիայական Հեզբոլլահ և Ամալ կուսակցությունների ձեռնարկած գործողությունները «քաղաքական հետևանքներ» են ունենալու:
Կուսակցությանը մոտ կանգնած աղբյուրները նույնպես վկայում են, որ 2006 թվականին ստորագրված Mar Mikhael համաձայնագիրը շատ մոտ է ավարտին («Mar Mikhael համաձայնագիրը» փոխըմբռնման հուշագիր է, որը ստորագրվել է 2006 թվականին Մար Միխայիլ եկեղեցում քրիստոնեական «Ազատ հայրենասիրական շարժման» առաջնորդ Միշել Աունի և շիայական Հեզբոլլահ կուսակցության ղեկավար Հասսան Նասրալլահի միջև):
«Միխայիլն [Մար Միխայիլ համաձայնագիրը] այլևս գոյություն չունի»,- Twitter-ում գրել է «Ազատ հայրենասիրական շարժման» փորձագետ Չարբել Խալիլը:
Հեզբոլլահը հրապարակայնորեն դեռևս չի մեկնաբանել այս իրադարձությունները:
«Ազատ հայրենասիրական շարժումը» բացի Հեզբոլլահից չունի այլ իրական դաշնակից: Ինչու՞ են թողնում իրենց վերջին դաշնակցին»,- դեկտեմբերի 23-ին հայտարարել է Հեզբոլլահի կողմնակից շեյխ Սադիկ Ալ-Նաբուլսին:
Նշենք, որ 2019թվականից սկսած, երբ Լիբանանը բախվեց ֆինանսական ճգնաժամի, «Ազատ հայրենասիրական շարժում» կուսակցությունը առերեսվել է օրեցօր աճող քաղաքական ճնշման Հեզբոլլահից հեռանալու պատճառով:
Հետևեք մեզ տելեգրամում
