Եվրոպայի Խորհրդի մարդու իրավունքների հարցերով հանձնակատար Դունյա Միյատովիչը այսօր հրապարակած նամակում կոչ է արել Ադրբեջանի նախագահ Իլհամ Ալիևին մշակման վերադարձնել մեդիայի մասին վերջերս ընդունված օրենքը, գրում է Turan-ը։
Ըստ հանձնակատարի՝ նոր օրենքն ընդունվել է առանց լայն ու բովանդակալից խորհրդակցությունների, և այն չի համապատասխանում մարդու իրավունքների, խոսքի և լրատվամիջոցների ազատության մասին միջազգային չափանիշներին։
Միյատովիչը շեշտել է, որ օրենքը չափից դուրս կանոնակարգում է ԶԼՄ-ները և լրագրողի մասնագիտությունը, ինչը հակասում է ազատ, անկախ, ցենզուրայի չենթարկվող ԶԼՄ-ների լրատվության և բազմակարծության սկզբունքներին։
«Ընդունված օրենքն էլ ավելի է վատացնում խոսքի և ԶԼՄ-ների ազատության հետ կապված իրավիճակը։ Այն պետական իշխանության մարմիններին լիազորություններ է տրամադրում լիցենզավորման միջոցով լրագրողների աշխատանքի սահմանափակման համար։ Այն նաև հնարավորություն է տալիս սահմանափակումներ մտցնել մեդիա ընկերությունների և կազմակերպությունների ֆինանսական, իրավական և օպերացիոն գործունեության վրա»,- գրել է հանձնակատարը։
Հետևեք մեզ տելեգրամում
