Իսրայելի վարչապետ Նաֆթալի Բեննեթն պաշտոնական առաջին այցով մեկնել է Բահրեյն: Տեղեկությունը հաստատում է վարչապետի աշխատակազմը:
Բեննեթը հանդիպելու է Բահրեյնի թագավոր Համադ բըն Իսա Ալ-Խալիֆայի հետ, թագաժառանգ և վարչապետ Սալման բըն Համադի, բարձրաստիճան այլ պաշտոնյաների, ինչպես նաև հրեական համայնքի ներկայացուցիչների հետ:
Իսրայելի վարչապետի աշխատակազմի տեղեկացմամբ՝ առաջնորդները քննարկելու են երկկողմ հարաբերությունները, հատկապես տնտեսական ոլորտում՝ կենտրոնանալով տեխնոլոգիաների և նորարարության վրա:
Ուշագրավ է, որ մայրաքաղաք Մանամայի արևմտյան հատվածում՝ Ալ-Դայեհ թաղամասում ցուցարարներ են հավաքվել, ովքեր դեմ են Բեննեթի այցին՝ վանկարկելով կարգախոսներ ընդդեմ երկկողմ հարաբերությունների կարգավորման:
Նշենք, որ փետրվարի սկզբին Իսրայելի պաշտպանության նախարար Բեննի Գանցը մեկնել էր Բահրեյն: Պաշտոնական այցի ընթացքում կողմերը ստորագրել են անվտանգության ոլորտին առնչվող համաձայնագրեր:
Հիշեցնենք, որ Իսրայելի և Բահրեյնի միջև հարաբերությունները կարգավորվել են 2020 թվականին ԱՄՆ-ի միջնորդությամբ: Իսկ արտգործնախարար Յաիր Լապիդը սեպտեմբերի 30-ին մեկնել էր Բահրեյն՝ մասնակցելու Մանամայում Իսրայելի դեսպանատան բացման արարողությանը:
Հետևեք մեզ տելեգրամում
