Իրանի արդյունաբերության, հանքերի և առևտրի նախարար Ռեզա Ֆաթեմի Ամինին հանդիպել է ՀՀ տարածքային կառավարման և ենթակառուցվածքների նախարար Գնել Սանոսյանի հետ:
Ամինին ընդգծել է, որ Իրանը պատրաստ է ճանապարհային ենթակառուցվածքների զարգացման, ամբարտակների, ՀԷԿ-երի կառուցման հարցերում համագործակցել Հայաստանի հետ:
«Իրանական հանքային ընկերությունները կարող են օգտվել Հայաստանի հանքերի պաշարներից և դրա դիմաց Հայաստանում ճանապարհներ ու ամբարտակներ կառուցեն: Հայաստանին վառելիքով ապահովելու և նավթաքիմիական արտադրանքի արտահանման հարցում ևս պատրաստ ենք համագործակցել, և Հայաստանի ենթակառուցվածքների նախարարի հետ նախնական համաձայնություններ ենք ձեռք բերել»,-ասել է նախարարը:
Ամինին նաև հայտնել է, որ քննարկվել է իրանական բեռնատարների համար ճանապարհային տուրքերն ըստ կմ-երի սահմանելու հարցը: Մատնանշելով Հյուսիս-Հարավ միջանցքի կարևորությունը՝ նախարարը շեշտել է Հայաստանի ճանապարհային ենթակառուցվածքների զարգացման և տարանցման ծավալների ավելացման անհրաժեշտությունը:
Հետևեք մեզ տելեգրամում
