Իրանի արտգործնախարար Ամիր Աբդոլլահիանը Վիեննայի հեռախոսազրույց է ունեցել Եվրամիության արտաքին քաղաքականության և անվտանգության հարցերով Բարձր ներկայացուցիչ Ժոզեպ Բորելի հետ: Կողմերը քննարկել են միջուկային բանակցություններին առնչվող մի շարք հարցեր:
Աբդոլլահիանն ընդգծել է, որ Արևմուտքի շտապողականությունը չի կարող խոչընդոտել Իրանի կարմիր գծերի պահպանմանը:
Նա շեշտել է, որ Վիեննայում արտգործնախարարի ներկայությունը և վերջնական համաձայնության մասին հայտարարելը կախված է Իրանի կարմիր գծերը հարգելու և տնտեսական երաշխիք տրամադրելու հետ:
«Ցանկացած պահի, երբ Արևմուտքը ընդունի մեր կարմիր գծերը, պատրաստ եմ ներկա գտնվել Վիեննայում»,- ասել է Աբդոլլահիանը:
Նկատենք, որ վերջին օրերին Միջուկային համաձայնագրի անդամ երկրները հայտարարում են, որ Վիեննայի բանակցությունները գրեթե ավարտվում են և համաձայնությունը մոտ է: Իրանը, սակայն, դեռ պնդում է, որ դեռ հարցեր կան կարգավորելու և քանի դեռ բոլոր հարցերը չեն լուծվել, ոչ ոք չի կարող ասել, որ համաձայնությունը ձեռք է բերվել:
Հետևեք մեզ տելեգրամում
