Լիբանանի և Պարսից ծոցի երկրների միջև հարաբերությունների բարելավումը սկսվել է Քուվեյթի նախաձեռնությունից, որը դեռևս հունվարին ներկայացվել էր Բեյրութին։ Այս մասին հայտարարել է Լիբանանի արտաքին գործերի նախարար Աբդալլահ Բուհաբիբը։
«Մենք շնորհակալություն ենք հայտնում Քուվեյթի արտգործնախարարին իր ջանքերի համար և հուսով ենք, որ Լիբանանի և Սաուդյան Արաբիայի միջև հարաբերությունները աստիճանաբար կվերականգնվեն», – ասել է Բուհաբիբը։
Լիբանանցի դիվանագետը անդրադարձել է նաև Բեյրութում Սաուդյան Արաբիայի դեսպանի վերադարձի մասին շրջանառվող լուրերին։
«Մենք Սաուդյան Արաբիայից չենք լսել, որ նրա դեսպանը կվերադառնա Լիբանան, իսկ այն ամենը, ինչ ասվել է, տպագրվել է միայն թերթերում»,- հավելել է նախարարը։
Ինչ վերաբերում է Քուվեյթի դեսպանի վերադարձին՝ Բուհաբիբը նշել է, որ հստակ ժամկետներ դեռ չկան։
Հիշեցնենք, որ Քուվեյթի արտգործնախարար Ալ-Սաբահը հունվարի 23-ին լիբանանցի բարձրաստիճան պաշտոնյաներին էր ներկայացրել Քուվեյթի նախաձեռնությունը, որը նպատակաուղղված է Լիբանանի և Պարսից ծոցի երկրների միջև վստահության մթնոլորտի ամրապնդմանը: Այն բաղկացած է 12 մասից և նախապայմաններ չի առաջադրում: Ալ-Սաբահը հայտնել է, որ այս նախաձեռնությունը համաձայնեցված է Պարսից ծոցի երկրների հետ: Իսկ Բեյրութի և Պարսից ծոցի երկրների միջև դիվանագիտական ճգնաժամի առիթ դարձավ Լիբանանի տեղեկատվության նախարար Ժորժ Կորդահիի՝ Aljazeera-ին տված հարցազրույցը, որով նա քննադատել էր Սաուդյան Արաբիայի քաղաքականությունը Եմենի պատերազմում:
Հետևեք մեզ տելեգրամում
