Հռոմի պապը հունիսին այցելելու է Բեյրութ՝ տնտեսական աննախադեպ ճգնաժամի պայմաններում արտահայտելու իր աջակցությունը Լիբանանին:
Սա կլինի Հռոմի պապի առաջին այցը 2012 թվականից ի վեր, երբ Բենեդիկտ 16-րդ պապը եռօրյա այց էր կատարել Լիբանան:
Լիբանանի նախագահ Միշել Աունի գրասենյակից հայտնել են, որ նա ընդունել է Լիբանանում Վատիկանի դեսպանին, ով տեղեկացրել է Հռոմի Ֆրանցիսկոս պապի՝ հունիսին կայանալիք այցի մասին: Հաղորդվել է, որ ճշգրիտ ամսաթիվն ու ժամանակացույցը կորոշվեն ավելի ուշ:
«Լիբանանցիները երկար են սպասել այս այցին, որպեսզի իրենց երախտագիտությունը հայտնեն Հռոմի պապին Լիբանանի և նրա ժողովրդի նկատմամբ իր դիրքորոշման համար», – ասել է Աունը:
Նշենք, որ անցյալ տարի Հռոմի Ֆրանցիսկոսը պապը, Վատիկանում ընդունելով Լիբանանի քրիստոնյա պատրիարքներին, հայտարարել էր, որ Լիբանանը պետք է մնա «հանդուրժողականության և բազմակարծության երկիր»:
Հարկ է նշել, որ Մերձավոր Արևելքում Լիբանանն արաբական միակ երկիրն է, որտեղ պետության ղեկավարը քրիստոնյա է, իսկ քրիստոնյաները կազմում են երկրի բնակչության մեկ երրորդը։ Վատիկանն անհանգստանում է, որ Լիբանանի փլուզումը վտանգավոր է հատկապես քրիստոնեական համայնքի շարունակական ներկայության համար, քանի որ Լիբանանը եկեղեցու համար պատնեշի դեր է կատարում Մերձավոր Արևելքում:
Հետևեք մեզ տելեգրամում
