Թուրքիայի դատարանը որոշում է կայացրել կասեցնել Washington Post-ի լրագրող Ջամալ Խաշոկջիի սպանության մեջ մեղադրվող 26 սաուդցիների դատավարությունը և գործը փոխանցել Սաուդյան Արաբիային։
Նշենք, որ ավելի վաղ՝ մարտի 31-ին թուրք դատախազը կոչ էր արել դատավարությունը փոխանցել Սաուդյան Արաբիայի իշխանություններին։ Իսկ Թուրքիայի արդարադատության նախարարն հայտարարել էր, որ կհաստատի այդ խնդրանքը։
«Մենք որոշեցինք դադարեցնել և գործը հանձնել Սաուդյան Արաբիային», – հայտարարել է Ստամբուլի դատարանը՝ բավարարելով դատախազի խնդրանքը։
Որոշումը կայացվել է՝ չնայած իրավապաշտպան կազմակերպությունների նախազգուշացումներին, թե գործը Սաուդյան Արաբիային հանձնելը կհանգեցնի սպանության կոծկմանը:
Խաշոկջիի նշանածը՝ թուրք ակադեմիկոս և հետազոտող Հաթիջե Ջենգիզը, հայտարարել է, որ բողոքարկելու է այս որոշումը։
Հիշեցնենք, որ 59-ամյա լրագրողը սպանվել է 2018 թվականի հոկտեմբերի 2-ին Ստամբուլում՝ Սաուդյան Արաբիայի հյուպատոսության շենքում:
Սաուդյան Արաբիայի դատարանը, հետաքննելով լրագրողի սպանությունը, մեղադրյալներին դատապարտել էր 7-ից 20 տարվա ազատազրկման:
Ուշագրավ է նաև, որ 2018 թվականի նոյեմբերին Թուրքիայի նախագահ Ռեջեփ Թայիփ Էրդողանը հայտարարել էր, որ սպանությունը «կանխամտածված» էր, և որ Խաշողջիի սպանության հրամանը ստացվել է Սաուդյան Արաբիայի կառավարության «բարձրագույն մակարդակներից»:
Տեղեկացնենք, որ առաջիկայում Թուրքիայի նախագահ Ռեջեփ Թայիփ Էրդողանն այցելելու է Սաուդյան Արաբիա: Թուրք վերլուծաբանների խոսքով՝ Էրդողանը նման կերպ փորձելու է ներդրումներ բերել Թուրքիա: Նրանց կարծիքով՝ հենց սրանով է պայմանավորված Խաշոկջիի սպանության հետաքննության գործում Թուրքիայի նման ժեստը:
Հետևեք մեզ տելեգրամում
