Ռուսաստանի արտաքին գործերի նախարար Սերգեյ Լավրովը հայտարարել է, որ ԱՄՆ-ն և Ֆրանսիան պատրաստ չեն շարունակել շփումները Ռուսաստանի հետ ԵԱՀԿ Մինսկի խմբի ձևաչափում: Այս մասին ասել է Սերգեյ Լավրովը ապրիլի 8-ին կայացած մամուլի ասուլիսի ժամանակ:
«Ինչ վերաբերվում է ԵԱՀԿ Մինսկի խմբի համանախագահության գործունեությանը և ապագային, ես չգիտեմ, թե ինչպիսին կլինի հետագա ճակատագիրը, որովհետև այդ խմբում մեր ֆրանսիացի և ամերիկացի այսպես կոչված գործընկերները, ռուսաֆոբ դրսևորումների շրջանակում, այն է` ամեն ինչ, ինչ կապված է Ռուսաստանի Դաշնությանը հետ, չեղարկել, չեղարկել են նաև ԵԱՀԿ Մինսկի խմբի ձևաչափը՝ հայտարարելով, որ պատրաստ չեն մեր հետ շփվել այդ ձևաչափում: Դա իրենց իրավունքն է, եթե նրանք պատրաստ են զոհաբերել Ղարաբաղի և ընդհանրապես Հարավային Կովկասի կարգավորման շահերը: Եթե նրանք պատրաստ են զոհաբերել այս դեպքում հայկական կողմի շահերը, ապա դա նրանց ընտրությունն է», – նշել է նա։
Լավրովի խոսքով՝ ԱՄՆ-ն և Ֆրանսիան ոչ միայն Լեռնային Ղարաբաղի հակամարտությունը, այլև մնացած բոլոր հակամարտությունները երկրի վրա դարձնում են ռուսատյացության քաղաքականության պատանդներ:
Նրա կարծիքով` Վաշինգտոնն ու Փարիզը ստիպում են բոլոր երկրներին դադարեցնել Ռուսաստանի հետ փոխգործակցությունը բոլոր ձևաչափերով, որպեսզի թելադրեն իրենց միակողմանի կամքը:
«Ես կարծում եմ, որ այդ մոտեցումը բացարձակ անպատասխանատու է: Նրանք մեզ դուրս չեն մղելու ընդհանուր գծից: Մենք հավատարիմ ենք, ինչպես միշտ եղել ենք հավատարիմ, ղարաբաղյան հակամարտության կարգավորմանը և բոլոր այն պայմանավորվածությունների կատարմանը աջակցելուն, որոնք ձեռք են բերվել եռակողմ ձևաչափով Հայաստանի, Ադրբեջանի և Ռուսաստանի ղեկավարների միջև։ Այս ընտրությունը մերը չէ։ Ու եթե Ֆրանսիան ու ԱՄՆ-ն որոշել են այդպես վարվել, ապա Աստված նրանց դատավորն է», – եզրափակել է Լավրովը։
Հետևեք մեզ տելեգրամում
