Սաուդյան Արաբիան և Քուվեյթը, հիմք ընդունելով 2022 թվականի մարտի 21-ին կողմերի միջև ստորագրված փոխըմբռման հուշագիրը, պայմանավորվել են արագացնել Դորա (Արաշ) գազի հանքավայրի շահագործումը։
«Սաուդյան Արաբիան և Քուվեյթը հաստատում են այս տարածքում բնական ռեսուրսներն օգտագործելու իրենց իրավունքը, և շարունակելու են աշխատել՝ իրականացնելու այն, ինչ համաձայնեցված է», – նշված է Սաուդյան Արաբիայի ԱԳՆ-ի տարածած հաղորդագրության մեջ:
Նշենք, որ նախկինում Սաուդյան Արաբիան և Քուվեյթը Իրանին առաջարկել են բանակցել ջրային սահմանի դեմարկացիայի շուրջ, սակայն այս հրավերը անպատասխան է մնացել։
«Սաուդյան Արաբիան և Քուվեյթը, որպես բանակցող կողմ, մեկ անգամ ևս հրավիրում են Իրանին անցկացնել այդ բանակցությունները»,- հավելել է Սաուդյան Արաբիայի ԱԳ նախարարությունը։
Ավելի վաղ՝ Իրանի ԱԳՆ խոսնակ Սաիդ Խաթիբզադեն, արձագանքելով Սաուդյան Արաբիայի և Քուվեյթի միջև Դորա գազային հանքավայրի շահագործման վերաբերյալ ստորագրած համաձայնությանն, այն անօրինական և անընդունելի է համարել: Խաթիբզադեն ընդգծել էր, որ Իրանը պատրաստ է հանաքավայրի շահագործման հարցի շուրջ բանակցել Սաուդյան Արաբիայի և Քուվեյթի հետ:
Նշենք, որ Դորա (Արաշ) գազի հանքավայրը գտնվում է Պարսից ծոցի ջրերում և հակասությունների առարկա է դարձել Քուվեյթի, Սաուդյան Արաբիայի և Իրանի միջև:
Հետևեք մեզ տելեգրամում
