Իրանի արտաքին գործերի գերատեսչության ղեկավարը հաստատել է, որ պաշտոնական Թեհրանի համար անընդունելի է, որ հարևան երկիրը ջրամաբարաշինության ոլորտում այնպիսի քայլեր ձեռնարկի, որ Իրանի ժողովրդի ու տարածաշրջանի համար խնդիրներ ստեղծի:
Այս մասին Իրանի արտգործնախարար Հոսեյն Աբդոլլահիանը հայտարարել է խորհրդարանի բաց նիստի ժամանակ՝ անդրադառնալով պատգամավորներից մեկի այն հարցին, թե ինչու Իրանը պաշտոնապես չի բողոքում Թուրքիայի կողմից Եփրատ, Տիգրիս և Արաքս գետերի վրա ջրամաբարների կառուցման քաղաքականության դեմ:
«Ես այս հարցը նախորդ ամիսներին առնվազն երեք անգամ քննարկել եմ Թուրքիայի արտգործնախարարի հետ հանդիպումների ու հեռախոսազրույցի ժամանակ և կոչ եմ արել ուշադրություն դարձնել հարևանության սկզբունքներին և քայլեր ձեռնարկել Արաքս գետի վրա ջրամբարների կառուցման ուղղությամբ»,- ավելացրել է Աբդոլլահիանը:
Նա նշել է, որ Թուրքիան 1997թ. Նյույորքյան կոնվենցիայի անդամ չէ, հակառակ դեպքում կկարողային հարցը միջազգային մեխանիզմներով լուծել:
Նշենք, որ այս խնդիրը բարձրաձայնել են նաև Իրանի այլ բարձրաստիճան պաշտոնյաներ: Մասնավորապես, Իրանի գլխավոր դատախազ Մոհամմադ Ջավադ Մոնթազերին Իրանի էներգետիկայի նախարարին ուղղված նամակում հանձարարել է լրջորեն հետամուտ լինել Արաքսի գետի ջրային ռեսուրսների նկատմամբ Իրանի իրավունքների պահպանմանը:
«Թուրքիայի կողմից Արաքս սահմանային գետի վրա մի քանի ամբարտակների և սահմանի զրոյական կետում պարսպի կառուցումը նվազեցրել է գետի հոսքը և փակել տարածաշրջանի բոլոր ջրային ուղիներն ու անցումները, և արևմտյան ու հարավային շրջաններից փոշու տարածման պատճառ դարձել»,- նշվել է նամակում:
Հետևեք մեզ տելեգրամում
