Մայիսի 10-ին Օմանում ՀՀ դեսպան (նստավայրը՝ Կահիրե) Հրաչյա Փոլադյանը հավատարմագրերն է հանձնել Օմանի սուլթան Նորին Օծություն Հայսամ բին Տարեկին։ Այս մասին տեղեկանում ենք Եգիպտոսում ՀՀ դեսպանատան ֆեյսբուքյան էջից։
Հաղորդվում է, որ հավատարմագրերի հանձնելուց հետո տեղի ունեցած առանձնազրույցի ընթացքում ՀՀ դեսպանը Նախագահ Վահագն Խաչատուրյանի անունից ջերմ ողջույններ է փոխանցել Սուլթանին։
Հրաչյա Փոլադյանը նշել է, որ Պարսից Ծոցի երկրներից Օմանը եղել է առաջինը, որի հետ հաստատվել են դիվանագիտական հարաբերություններ (1992թ. հուլիս) և արդեն ամռանը նշվելու է դիվանագիտական հարաբերությունների հաստատման 30-ամյակը։
Հայ-օմանական երկկողմ հարաբերություններն առավել զարգացնելու նպատակով դեսպան Փոլադյանը մի շարք առաջարկներ է ներկայացրել սուլթան Հայսամ բին Տարեկին, որոնք դրական են ընդունվել։
Զրույցի ավարտին Սուլթանը հաջողություն է մաղթել ՀՀ դեսպան Հրաչյա Փոլադյանին իր առաքելության մեջ։
Հետևեք մեզ տելեգրամում
