ԱՄՆ-ի երկու բարձրաստիճան պաշտոնյաներ գաղտնի ժամանել են Սաուդյան Արաբիա բանակցություններ վարելու համաձայնագրի շուրջ, որը խթանելու է Վաշինգտոնի և Ռիյադի հարաբերությունները՝ միևնույն ժամանակ թագավորությանը մերձեցնելով Իսրայելի հետ հարաբերությունների կարգավորմանը:
Axios պարբերականը մանրամասնել է, որ ԱՄՆ ազգային անվտանգության խորհրդի Մերձավոր Արևելք բաժնի համակարգող Բրեթ Մըքգարքը և պետդեպարտամենտի էներգետիկայի բանագնաց Ամոս Հոխշտեյնը ժամանել են Սաուդյան Արաբիա՝ բանակցություններ վարելու սաուդցի բարձրաստիճան պաշտոնյաների հետ:
Axios-ի տեղեկացմամբ՝ Բայդենի վարչակարգը որպես միջնորդ է հանդես գալիս ավարտին հասնցելու Եգիպտոսից Սաուդյան Արաբիային Տիրան և Սանաֆիր կղզիների հանձնումը:
2017 թվականին Եգիպտոսի նախագահ Աբդել Ֆաթահ Ալ-Սիսին վավերացրել է կղզիները Սաուդյան Արաբիային հանձնելու պայմանագիրը։ Այս գործարքը Եգիպտոսում բողոքի ցույցերի առերեսվեց և այդպես էլ ավարտին չհասցվեց:
Axios-ը գրում է, որ Կարմիր ծովի երկու կղզիները կարևոր տեղ են զբաղեցնում 1979 թվականին ստորագրված իսրայելա-եգիպտական խաղաղության համաձայնագրում, որը Իսրայելի քաղաքացիական և ռազմական նավերին անվտանգ անցում է խոստանում Տիրանի նեղուցների նեղ ջրային ուղիներով:
Որպես 1979 թվականի գործարքի մաս՝ Եգիպտոսը համաձայնել էր ապառազմականացնել կղզիները և թույլատրել ԱՄՆ-ի գլխավորած բազմազգ դիտորդների ներկայությունը՝ դրանք պարեկելու համար: Դրանց հանձնումը Սաուդյան Արաբիային, հետևաբար, պահանջում է Իսրայելի որոշակի մասնակցություն:
Նշենք, որ Տիրանի նեղուցները Իսրայելի միակ ջրային ճանապարհն են Էյլաթից դեպի բաց ծով, որը թույլ է տալիս նավարկել դեպի Աֆրիկա և Ասիա և հակառակ ուղղությամբ՝ առանց Սուեզի ջրանցքով անցնելու:
ԱՄՆ-ը կարծում է, որ կղզիների վերաբերյալ համաձայնագիրը կարող է նաև վստահություն ստեղծել Իսրայելի և Սաուդյան Արաբիայի միջև, որն անհրաժեշտ է հարաբերությունների կարգավորմանն ուղղված ավելի հեռուն գնացող քայլերի համար:
Հետևեք մեզ տելեգրամում
