Իրանական ISNA լրատվական կայքում հրապարակվել է միջազգային հարցերով փորձագետ Էհսան Մովահեդիանի «Ադրբեջանական դասագրքերում սուտ ու կեղծիքի առկայությունը» վերնագրով հոդվածը։
Հոդվածում նշվել է, որ Ադրբեջանում սերնդի դաստիարակությունն իրականացվում է կեղծ ու շփոթեցնող բովանդակություն ունեցող դասագրքերով:
Region Monitor-ը ներկայացնում է հոդվածի կարևոր հատվածները ստորև.
Նախ նշվել է, որ Իրանի ուշադրության պակասի և Թուրքիայի ու «Սիոնիստական ռեժիմի» մշակութային ու քաղաքական մեծածավալ գործունեության հետևանքով հակաիրանական բնույթի անհիմն բազում նյութեր են հրապարակվել ադրբեջանական դասագրքերում:
Մասնավորապես պատմական փաստերի խեղաթյուրումը, Իրանում էթնիկ պատկանելություն հրահրելու փորձերը, իրանական գրական ստեղծագործությունների բռնագրավումը, ռասիստական, հակաիրանական, հակահայկական հասկացությունների փոխանցումը Բաքվում կազմված դասագրքերի հիմնական բովանդակության մաս են կազմում։
Այս համատեքստում Ադրբեջանում երեխան մեծանում է այն մտածելակերպով, որ Իրանը և Հայաստանը նրա ամենամեծ թշնամիներն են, և որ թույլատրելի է նրանց ոչնչացնել և դիմակայել ցանկացած միջոցներով։
Ստորև ներկայացնում ենք ադրբեջանական դասագրքերում ընդգրկված պատմական խեղաթյուրման և ատելության մի քանի դեպքեր.
1․ Ադրբեջանի դասագրքերում ասվում է, որ հարյուրավոր տարիներ առաջ Ադրբեջան անունով երկիր է եղել, որը ներառում է Արդաբիլն ու Թավրիզը, և իրանցիները ներխուժել են այս երկիր, իսկ Թուրքմենչայի պայմանագրով այս երևակայական երկիրը բաժանվել է երկու մասի, որի մի մասը անցել է Իրանին։ Բաքվի իշխանությունները Իրանի այս հատվածի համար օգտագործում են Հարավային Ադրբեջան կեղծ եզրույթը։
2․ Բաքվի կառավարության դասագրքերում տարածքային պահանջներ են ներկայացվում Իրանի մի քանի շրջանների նկատմամբ, և նույնիսկ Մազանդարան և Գիլան նահանգներն ընդգրկված են Ադրբեջանի կազմում։
3․ Ադրբեջանի 11-րդ դասարանի պատմության գրքում ասվում է, որ գոյություն է ունեցել անկախ Ադրբեջան պետություն, որը Թուրքմենչայի համաձայնագրից հետո օկուպացվել է Իրանի և Ռուսաստանի կողմից և բաժանվել երկու մասի։
4․ Իրանի բազմաթիվ դինաստիաների և թագավորների իրանական իսկությունը կասկածի տակ է դրվում, ինչը Ադրբեջանում և Թուրքիայում պատմական խեղաթյուրման և կեղծիքի մշտական գործելաոճից է:
5․ Ադրբեջանական դասագրքերում առավել տարածված են Հայաստանի և հայերի դեմ խեղաթյուրումները և ատելության խոսքը։ Օրինակ՝ չորրորդ դասարանի դասագրքում նշվում է, որ հային պետք է սպանել՝ կացնով հարվածելով նրա գլխին։
6.Իրանի գրականության ներկայացուցիչներից ոմանք, ովքեր ծնվել են Ատրպատականում ներկայացված են որպես ադրբեջանցիներ։
7․ Հրապարակվում են կեղծ պատմաաշխարհագարական քարտեզներ։
8․ Ադրբեջանում որոշ ուսուցիչներ համակարգված կերպով այլ երկրների դեմ ատելության խոսք են տարածում։
Հետևեք մեզ տելեգրամում
