Հոկտեմբերի 31-ին ավարտվելու է Լիբանանի գործող նախագահ Միշել Աունի նախագահական լիազորությունները: Խորհրդարանում արդեն գումարվել է թվով 4 նիստ՝ նախագահ ընտրելու համար, սակայն բոլոր նիստերը ձախողվել են օրենսդիրների միջև հակասությունների պատճառով:
Նախագահի պաշտոնի համար հիմնական թեկնածուներն են.
Սուլեյման Ֆարանջիե
Սուլեյման Ֆարանջիեն «Մարադա շարժում» քրիստոնեական կուսակցության ղեկավարն է, խորհրդարանի նախկին օրենսդիր և «Հեզբոլլահ» շիայական կուսակցությանը մոտ կանգնած քաղաքական գործիչ: Նա Սիրիայի նախագահ Բաշար Ալ-Ասադի մտերիմ ընկերն է:
Սուլեյման Ֆարանջիեն պաշտոնապես չի դրել իր թեկնածությունը, սակայն ԶԼՄ-ներին հայտնել է, որ հետաքրքրված է նախագահի պաշտոնով:
Նրա պապիկը՝ Սուլեյման Ֆարանջիեն Լիբանանի նախագահի պաշտոնում է եղել 1970-1976 թթ.:
Միշել Մուավադ
Միշել Մուավադը Լիբանանի խորհրդարանում պատգամավոր է՝ ներկայացնելով Զղարթա շրջանը: Նրա հայր՝ Ռենե Մուավադը նախագահի պաշտոնում պաշտոնավարել է ընդամենը 17 օր: Նա սպանվել է 1989 թվականին: Երեկ կայացած նիստի ժամանակ Միշել Մուավադը ստացել էր 39 ձայն՝ 128 պատգամավորներից բաղկացած խորհրդարանից:
Ջեբրան Բասիլ
Ջեբրան Բասիլը «Ազատ հայրենասիրական շարժում» քրիստոնեական կուսակցության ղեկավարն է: Բասիլը գործող նախագահ Միշել Աունի փեսան է և համարվում է նրա քաղաքական ժառանգորդը: Ջեբրան Բասիլին շատերը համարում են «ստվերներից գործող նախագահ»:
Ժոսեֆ Աուն
Ժոսեֆ Աունը Լիբանանի զինված ուժերի հրամանատարն է և ի համեմատ մյուս թեկնածուների՝ քաղաքական գրեթե բոլոր ուժերի հետ լավ հարաբերություններ է պահպանում: Սակայն նրա թեկնածությունն առաջադրելու համար պահանջվելու է սահմանադրական փոփոխություն՝ նրա ներկայիս պաշտոնի առնչությամբ:
Ժոսեֆ Աունի թեկնածությունը դիտարկվում է որպես փոխզիջումային քայլ, եթե օրենսդիրները չկարողանան համաձայնության գալ թեկնածուի ընտրության հարցում:
Հետևեք մեզ տելեգրամում
